Մենք իրավունք ունենք փողոց փակելու, ոնց որ ազգին սովորեցրել է վարչապետը. բերման ենթարկվածներն ազատ են արձակվել

Ինձ վրդովեցրեց, որ այսօրվա հանդիպումն ուղիղ եթեր չի հեռարձակվել, քանի որ այն ազգին վերաբերվող հարց է։ Բացի այդ՝ փակ էին Բաղրամյան 26–ի ոչ միայն դարպասները, որը խոստացվել էր, որ ժողովրդի համար միշտ պետք է բաց լինի, այլ նաեւ փակ էր մայթը։ Այս մասին այսօր՝ օգոստոսի 19-ին, ասել է ակտիվիստ Միքայել Մարգարյանը, որը Բաղրամյան պողոտայից բերման էր ենթարկվել, ապա ազատ արձակվել։

Նրա խոսքով՝ ոստիկանների ուղեկցությամբ շարժվել են ԱԺ, որպեսզի շարունակեն իրենց ակցիան, սակայն այնտեղ եւս թույլ չեն տվել մուտք գործել ԱԺ բակ։

«Համարում եմ, որ մենք այլ ելք չունեինք, քան փակել փողոցը։ Բաղրամյանը փորձեցինք փակել, փորձեցինք ժողովրդի ուշադրությունը գրավել այս խայտառակ իրավիճակին։ Մեզ բերման էին ենթարկել հենց փողոցը փակելու համար։ Այստեղ նշվում է ոստիկանի օրինական պահանջը չկատարելը, բայց ոստիկանության պահանջն ապօրինի էր, օրինական չէր եւ մենք իրավունք ունեինք ե՛ւ հավաք անելու ե՛ւ փողոց փակելու, ոնց մեզ հորդորել, սովորեցրել է, ազգին սովորեցրել է մեր ներկայիս վարչապետը։ Բավականին կոպիտ ձեւով ոստիկանությունը բերման է ենթարկել եւ արդեն այստեղ ամեն ինչ օրենքի տառին համապատասխան»,– ասել է բերման ենթարկվածներից Միքայել Մարգարյանը։

Նրա խոսքով՝ սա երկրորդ դեպքն է, երբ ինքը հանդիպում է ոստիկանական կոպիտ գործողությունների նոր իշխանությունների ժամանակ։

«Առաջինը դա «Սասնա Ծռերի» դատավարության ժամանակ էր, երբ մենք ոստիկանական կոշտ ուժերի հանդիպեցինք՝ գիշերը ժամը 5–ին, առանց զգուշացնելու։ Կարծում եմ դա իրենց համար փորձ էր։ Այսօրվա Հայաստանում այդպիսի վարվելակերպ չպետք է լինի։ Երբ ոստիկանին ասում ես՝ խնդիր չկա, ես պատրաստ եմ բերման ենթարկվել, եթե համարում եք, բայց մի կոպտեք, ու թեւ են ոլորում, ձեռքից հեռախոս են ուզում խլել, երբ դու ուղիղ եթեր ես անում, հեռախոսս վայր ընկավ, ավելին՝ հիմա ներսում կապտուկներով մարդ կա»,– ասել է Մարգարյանը։

Նա անդրադարձել է նաեւ բերման ենթարկվածներից Գեղամ Ադյանին, որի ինքնազգացողությունը բաժնում վատացել էր եւ տեւական ժամանակ քննարկելուց հետո նոր միայն թույլ էին տվել շըապ օգնության մեքենայով տեղափոխել հիվանդանոց։

«Սիրտն էր վատացել տղայի, սրտից հիվանդ երիտասարդ է։ Ասում ենք՝ ջուր տվեք, պատասխանում են՝ թող գնա, պուլպուլակից խմի, այդ կարգի արտահայտություններ էր։ Կարծում եմ ոստիկանությունը դեռ հին իներցիայի տակ է»,- ասել է ակտիվիստը։

Նրա խոսքով՝ սա իրենց մեջ վախ չի առաջացրել, եւ պատրաստ են կրկին փողոց փակել։

«Ամոթ է՝ մենք ասենք, որ վախենում ենք ներկայիս ոստիկանությունից, ո՛չ, վարչապետը եւ ոստիկանապետը պետք է վախենան ժողովրդից։ Վերջապես պետք է վախենան ժողովրդից եւ հաշվի նստեն ժողովրդի պահանջին, իսկ այսօր պահանջ կա՝ Ամուլսարը չշահագործելու»,–ասաց Մարգարյանը։

Հիշեցնենք, ավելի վաղ Operativ լրատվականը հայտնել էր, որ Քննչական կոմիտեն հրապարակել էր Ամուլսարի ոսկեբեր քվարցիտների հանքավայրի շահագործման հետ կապված համալիր փորձաքննության արդյունքները, որի կատարումը հանձնարարվել էր Advanced Resources Development (ELARD) ընկերության փորձագետների խմբին:

Ըստ այդ փորձաքննության արդյունքների՝ եզրակացության ընթացքում 16 կետ է նշվել, որոնք պահպանելու դեպքում բնապահպանական ռիսկերը կդառնան կառավարելի:

Բաղրամյան 26-ում վարչապետ Նիկոլ Փաշինյանը ջերմուկցիներին հրավիրել էր հանդիպման:

Միաժամանակ Բաղրամյան-26-ի դիմաց բողոքի ակցիա էր ընթանում ընդդեմ Ամուլսարի հանքի շահագործման:

Ցուցարարներից մեկն էլ ասել էր, թե՝ «Սերժիզմը շարունակվում է ու եթե ինքը չսթափվի, ինքը արժանանալու է Սերժ Սարգսյանի ճակատագրին»:

«Նիկոլը ազգի դավաճան է, Նիկոլը Սերժի շարունակությունն է», նման կերպ արտահայտվել էր ակտիվիստ Թեհմինե Ենոքյանը:

Հիշեցնենք նաև, որ Ամուլսարի շահագործման դեմ բողոքի ակցիայի մասնակիցներից 6 անձ բերվել է ոստիկանություն :

Քիչ առաջ էլ Փաշինյանի և «Իմ քայլի» պատգամավորների հանդիպումն ավարտվեց. վարչապետը ուղիղ եթերում հանդես կգա հայտարարությամբ:

Սակայն Ալեն Սիմոնյանն էլ հայտարարել է, որ եթե 0,1 տոկոս կասկած կա, որ Ամուլսարի շահագործումից կտուժի Ջերմուկը, հանքը չի շահագործվի :