Բայդենը հանդես է եկել կլիմայի հարցով Փարիզյան համաձայնագրին ԱՄՆ-ի անհապաղ վերադարձի օգտին

ԱՄՆ նախկին փոխնախագահ Ջոզեֆ Բայդենը, որը դեմոկրատների շրջանում նախընտրական մրցապայքարի առաջնորդն է, 2020 թվականի նախագահական ընտրություններում հաղթելու դեպքում մտադիր է վերականգնել ԱՄՆ անդամակցությունը կլիմայի հարցով Փարիզյան համաձայնագրին: Նա այս մասին հայտարարել է չորեքշաբթի դեմոկրատների երկրորդ հեռուստաբանավեճի ժամանակ, որն անցկացվում է Դեթրոյթում (Միչիգան նահանգ), հայտնում է CNN-ն:

Խոսելով միջոցառումների մասին, որոնք կնախաձեռնի, եթե դառնա պետության ղեկավարը, Բայդենը շեշտել է, որ կվերադառնար Փարիզյան համաձայնագիր: «Ես անհապաղ կվերադառնայի կլիմայի հարցով Փարիզյան համաձայնագիր»,- ասել է նա: Նա հանդես է եկել նաեւ ԱՄՆ-ում էլեկտրամոբիլների համար 500 հազար լիցքավորման կայանների ստեղծման օգտին: Նախկին փոխնախագահի կարծիքով՝ դա թույլ կտա 2030 թվականին երկրում գործնականում ամբողջությամբ անցնելու էլեկտրատրանսպորտի:

Բայդենը նաեւ հայտարարել է, որ ընտրություններում հաղթելու դեպքում 400 մլրդ դոլար կհատկացներ գիտական հետազոտություններին՝ պարզելու համար, թե ինչպես կարելի է կանխել մոլորակում կլիմայի փոփոխությունը: Նախկին փոխնախագահը հավաստիացրել է, որ միջոցներ կձեռնարկեր ԱՄՆ-ում որպես էներգիայի աղբյուր ածխի կիրառումը կրճատելու համար, ինչպես նաեւ ածխաջրածինների արդյունահանման ֆրեքինգի մեթոդի (շերտի հիդրոճեղքում) կիառման կրճատման համար: «Մենք կմտածենք այն մասին, որ դա վերջնականապես դադարեցվի, ու սուբսիդիաներ չեն լինի ո՛չ մեկի, ո՛չ մյուսի համար,- հավելել է նա: - Ցանկացած հանածո վառելանյութի համար»:

Բայդենը ներկայումս քաղաքական գործիչների շրջանում առաջնորդ է համարվում, որոնք հավակնում են դեմոկրատների կողմից ԱՄՆ նախագահի պաշտոնի թեկնածու առաջադրվելուն: Ըստ հարցումների՝ նախկին փոխնախագահի վարկանիշը վերջին օրերին եղել է մոտ 25 տոկոսից մինչեւ 35 տոկոսի մակարդակում:

Կլիմայի հարցով Փարիզյան համաձայնագիրը ստորագրվել է 2015 թվականի դեկտեմբերի 12-ին Ֆրանսիայի մայրաքաղաքում: Այս փաստաթուղթը վավերացրած պետությունները պայմանավորվել են թույլ չտալ մոլորակի ջերմաստիճանի բարձրացում 2100 թվականին Ցելսիուսի ավելի քան 2 աստիճանից՝ մինչարդյունաբերական դարաշրջանի համեմատությամբ: ԱՄՆ նախագահ Դոնալդ Թրամփը 2018 թվականին որոշել էր համաձայնագրից դուրս գալ, որը, նրա կարծիքով, արգելակում է ամերիկյան տնտեսության զարգացումը: