Ռոբերտ Քոչարյանի շուրջ համախմբվելու գրավականը նրա կառավարման տարիներին տնտեսության աճն է. նախկին պատգամավոր

Հայաստանի երկրորդ նախագահ Ռոբերտ Քոչարյանի շուրջ համախմբվելու գրավականը նրա կառավարման տարիներին 10-ամյա տնտեսական աճն է: Շատերի համար նրա վերադարձը սպասելի է: Հուլիսի 31-ին լրագրողների հետ հանդիպման ժամանակ այս մասին ասաց «Բարգավաճ Հայաստան» կուսակցությունից ԱԺ նախկին պատգամավոր Ստեփան Մարգարյանը:

Նրա խոսքով՝ հասարակության մեջ սկսել է ձեւավորվել իշխանություններին այլընտրանք, եւ խոսքը միայն Ռոբերտ Քոչարյանի մասին չէ: «Մենք այսօր ապրում ենք միայն անցյալով, ոչ ոք չգիտի, թե իրեն ապագայում ինչ է սպասում: Երկիրը չունի այնպիսի ռեսուրսներ, որ երկար հանդուրժի այն, ինչ տեղի է ունենում դատական իշխանության շուրջ: Դատարանների վրա նման ճնշում երբեք չի եղել, եւ համակարգը դեռ երկար ուշքի չի գա»,- նշեց նա:

Մարգարյանի գնահատմամբ՝ դատավոր Դավիթ Գրիգորյանի դեմ քրեական գործը իշխանության ուզուրպացիայի փորձի դրսեւորումներից միայն մեկն է, քանի որ մինչ այդ եղել է հոկտեմբերի 2-ի ակցիան՝ խորհրդարանի պաշարմամբ, այնուհետեւ դատարանների շենքերի մուտքերն ու ելքերը փակելու կոչը, ինչպես նաեւ վարչապետ Նիկոլ Փաշինյանի հայտարարություններն այն մասին, որ դատավորներից ոչ մեկը չի համարձակվի չկատարել իր պահանջները: «Այս ամենը հանգեցրեց նրան, որ Ազգային ժողով ունենք, որը հանրության կյանքում ոչ մի դերակատարում չունի, լիովին վերահսկելի է եւ չի արտացոլում այն սպասումները, որոնք բնակչության շրջանում կան: Ամեն ինչ տանում է նրան, որ Փաշինյանի գլխավորությամբ քաղաքական ուժը գնում է դատական համակարգի հնազանդեցմանը, որին կհետեւի արդեն լրատվամիջոցների հնազանդեցումը, քանի որ առանց դրա անհնար կլինի լեգիտիմացնել նաեւ սեփականության վերաբաշխումը, իսկ դա անպայման տեղի կունենա»,- ընդգծեց նախկին պատգամավորը:

Նա նշեց, որ Ռոբերտ Քոչարյանի ելույթներում նաեւ ծրագրային կետեր կան, նշված են ակտիվ գործողություններ սկսելու ժամկետները: «Աշնանը պետք է գործընթացներ սպասել: Սա անչափ կարեւոր է՝ հաշվի առնելով, որ այսօր խորհրդարանում ընդդիմություն չկա: Այն փողոցում կստեղծվի: Քոչարյանը մեծ դեր կխաղա ծրագրային ընդդիմության ձեւավորման գործում: Մենք այդպես էլ չտեսանք ո՛չ իշխանությունների, ո՛չ խորհրդարանական «ընդդիմության» ծրագրերը: Այսպիսի պայմաններում չարժի ներդրումներ սպասել: Նախկինում «կոնսենսուս մինուս մեկը» իշխանություններն էին, հիմա դարձել է ինքը՝ Նիկոլ Փաշինյանը»,- նշեց նախկին պատգամավորը: