Դավիթ Գրիգորյանը ներկա չի գտնվել իր լիազորությունների կասեցման վերաբերյալ որոշման հրապարակմանը. Բեքմեզյան

Երևանի ընդհանուր իրավասության դատարանի դատավոր Դավիթ Գրիգորյանը ներկա չի գտնվել իր լիազորությունների կասեցման վերաբերյալ ԲԴԽ–ի որոշման հրապարակմանը։ Այս մասին News.am-ին հայտնել է ԲԴխ անդամ Գրիգոր Բեքմեզյանը։

Վերջինս հայտնել է, որ Դավիթ Գրիգորյանի նկատմամբ քրեական հետապնդում հարուցելուն համաձայնություն տալու մասին դատախազության միջնորդությունը ԲԴԽ–ն քննարկել է դատավոր Դավիթ Գրիգորյանի մասնակցությամբ՝ հուլիսի 26–ին։

Նա նշել է, որ նիստի ընթացքում Դավիթ Գրիգորյանը հարցեր է տվել դատախազին, պատասխանել է ԲԴԽ անդամների հարցերին, ներկայացրել է իր դիրքորոշումը ։

«Նիստի ժամանակ հայտարարվել է որոշման հրապարակման օրվա և ժամի մասին, սակայն դատավորը դատական դեպարտամենտին տեղեկացրել է, որ չի ներկայանալու հրապարակմանը»,–ասել է Բեքմեզյանը։

Բեքմեզյանը տեղեկացրել է, որ որոշման վերջնական տեքստն այսօր պատրաստ կլինի և այն կտրամադրեն դատավորին։

Հիշեցնենք, որ հուլիսի 26-ին ՀՀ գլխավոր դատախազի պաշտոնակատար Արմեն Հարությունյանի կողմից Բարձրագույն դատական խորհուրդ է ներկայացվել միջնորդություն՝ երեք դրվագով ՀՀ ՔՕ 314 հոդվածի 1-ին մասի (պաշտոնեական կեղծիք) հատկանիշներով քննվող քրեական գործով դատավոր Դավիթ Գրիգորյանի նկատմամբ քրեական հետապնդում հարուցելուն համաձայնություն տալու մասին։ Հաջորդ օրը ԲԴԽ–ն որոշում է կայացրել միջնորդությունը երկու դրվագներով բավարարել, իսկ մեկով՝ մերժել։

Հիշեցնենք նաև, երեկ Operativ լրատվականը հաղորդել էր, որ Դավիթ Գրիգորյանի լիազորությունները ր ժամանակավորապես կասեցվել են: