«Եթե հետևություններ չանենք ավելի ծանր և բարդ իրավիճակում կհայտնվենք». «Այլընտրանքային նախագծեր» խումբը Իջևանի դեպքերի և երկրում տիրող ընդհանուր մթնոլորտի մասին
«Այլընտրանքային նախագծեր խմբի» անդամ, քաղաքագետ Գեղամ Նազարյանը հարցազրույց է տվել տեղական կայքերից մեկին՝ անդրադառնալով Սևանի կանաչ ջրիմուռներով աղտոտվելու և այլ՝ հայկական իրականությունն ու լրատվամիջոցները օրեցօր պայթեցնող խնդիրներին:
- Պրն Նազարյան, Հայաստանի այս կամ այն մարզում ինքնաբուխ բողոքի գործողություններ են, որոնց ընթացքում ճանապարհներ են փակվում: Գագաթնակետը կարծես իջևանյան վերջին դեպքերն են:
- Եթե այսպես շարունակվի, ապա իջևանյան դեպքերը հաստատ գագաթնակետը չեն լինի: Եթե իշխանությունները, քաղաքական դաշտը, քաղաքացիական հասարակությունը, հանրությունը լուրջ հետևություններ չանեն, ապա հետևանքներն ավելի ծանր և բարդ են
լինելու: Ավելի պարզ ասեմ՝ եթե չսթափվենք, եթե չվերադառնանք իրականություն, ապա նոր ցնցումներ են լինելու:
- Մի՞թե չեք խտացնում գույները:
- Ոչ թե չեմ խտացնում, այլ մի փոքր ավելի մեղմ եմ ներկայացնում իրավիճակը: Սևանում ճանապարհ են փակում, Արագածոտնում ճանապարհ են փակում, Իջևանում դարձյալ ճանապարհ են փակում: Այստեղ արդեն էական չէ, թե ինչ պահանջներ են ներկայացնում: Այստեղ կարևորը երկրում հաստատված մթնոլորտն է: Ժողովուրդն անցած
տարվա ապրիլ-մայիսին այսօրվա իշխանություններից ազդակներ ստացավ և այն յուրովի ընկալեց: Երբ վարչապետը հայտարարում է, թե կառավարության դուռը ժողովրդինն է՝ կարող են և ջարդել, երբ հենց ինքն էր դռներ կոտրում, երբ կամուրջներ էր արգելափակում, երբ գնացքներ էր կանգնեցնում, ապա հանրությունը վաղ, թե ուշ այս ամենը պետք է կրկներ, կիրառեր յուրովի:
- Կարծիք կա, թե բողոքի գործողությունների հետևում ինչ-որ մութ ուժեր կան, և որ այս ամենը ժողովրդի ձայնը չէ:
- Եթե իշխանությունը որդեգրել է իրականությունը չտեսնելու և ամեն ինչ հակահեղափոխականների վրա գցելու գործելաոճը, ապա այս ամենն ավելի վատթար հետևւանքներ է ունենալու: Իրականում որևէ պահանջ միշտ ներկայացնում է հանրության այս կամ այն խումբը, մեծ կամ փոքր: Չի կարող այդ պահանջը լինել բոլորինը: Ընդամենը պետք է ուժ ունենալ և տեսնել, որ երբ թողնում ես, որ անտառը հատեն յուրայինները, իսկ
մյուսներին թույլ չես տալիս, ապա հաստատ լուրջ խնդիր է առաջանալու:
Երբ Սևանի ափին գործող տնտեսվարողների հետ պարզ և շիտակ խոսակցություն չես ունենում, երբ ժողովրդին չես ներկայացնում Սևանի առջև ծառացած խնդիրները, ապա հաստատ մի օր բողոքի ալիք է բարձրանալու:
- Ի՞նչ պետք է անի իշխանությունն այս իրավիճակում:
- Հանուն Հայաստանի, հանուն մեր ժողովրդի իշխանությունը պետք է արմատապես փոխի իր գործելաոճը: Չի կարելի երկրորդ նախագահին դարձնել քաղբանտարկյալ և ակնկալել, որ երկրում ներդրումներ կլինեն:
Չի կարելի հիվանդ մարդուն կալանքի տակ պահել և ակնկալել, որ երկրում առաջընթացի և զարգացման մթնոլորտ կստեղծվի: Չի կարելի դատավորին հետապնդել իր կայացրած որոշման, ընդ որում ոչ ապօրինի որոշման համար և հայտարարել, թե նպատակդ արդար
դատաիրավական համակարգի ստեղծումն է: Չի կարելի յուրայինի ՍԴ նախագահ դարձնելու փորձեր անել և հայտարարել, թե նպատակը 2019-ին համապատասխան ՍԴ-ի ստեղծումն է: Չի կարելի թույլ տալ, որ անտառը կտրեն յուրայինները, իսկ մյուսներին` արգելել: Չի կարելի չլուծված թողնել Ամուլսարի հանքի խնդիրը, այն վերածելով ևս մեկ
չպայթած ականի և ակնկալել տնտեսական հեղափոխություն: Պետք է հստակ դիրքորոշում հայտնել: Ի՞նչ պետք է անի իշխանությունը: Ընդամենը պետք է դուրս գա անցյալից, չպետք է ամենուր հակահեղափոխականներ և սև ուժեր տեսնել, և իհարկե, պետք է գործ անել, աշխատել: Իջևանը, Սևանը դեռ սկիզբն է: Եթե կառավարող ուժը
չվերանայի իր մոտեցումները, եթե չվերադառնա իրականություն, եթե չփոխի երկրում առկա մթնոլորտը, ապա նոր ցնցումներն անխուսափելի են, ինչը Արցախի խնդիր ունեցող երկրի համար անընդունելի է և վտանգավոր: Սա մեր կազմակերպության՝ «Այլընտրանքային նախագծեր խմբի» հստակ գնահատականն է առկա իրավիճակին:
Աննա Բաղդասարյան
Top-News.am