Հաքերային հարձակում հնարավոր չէ, ֆիզիկական վթար է եղել. փոքր ՀԷԿ-երի նախագահը՝ էներգետիկ վթարի մասին

Հուլիսի 10-ին Operativ լրատվականը հաղորդել էր, որ ժամը 12.30-ից էլեկտրականության խափանումներ են հանրապետության տարածքում:

Այս առնչությամբ փոխվարչապետ Տիգրան Ավինյանը հայտնել էր. «Ունենք վթար էներգետիկ համակարգում։ Երևանի ՋԷԿ-ը և Հրազդանի 5-րդ բլոկը անջատված են։ Հանրապետությունով մեկ հնարավոր են անջատումներ։ Աշխատանքներ են տարվում, որպեսզի խնդիրը մինչև երեկոյան ժամը 7-ը կարգավորվի»:

ՀՀ Կրթության և գիտության նախարարն էլ իր Facebook-ի էջում հանդես էր եկել կոչով՝ «Մի քանի ժամ էլեկտրաէներգիա քիչ օգտագործենք»:

Խափանվել էր նաև Երևանի Մետրոպոլիտենի աշխատանքը:

էլէկտրաէներգետիկ համակարգի մասշտաբային խափանման պատճառները պարզելու նպատակով ԱԱԾ տնօրեն Արթուր Վանեցյանը հանձնարարել է նյութեր նախապատրաստել։

Արթուր Վանեցյանը նշել է, որ նախնական տվյալներ կան, բայց պետք է սպասել խորը ուսումնասիրության, որից հետո գնահատական կտրվի։

Տարածքային կառավարման և ենթակառուցվածքների փոխնախարար Հակոբ Վարդանյանը չի բացառում հաքերային հարձակման տարբերակը։

ՀՀ փոքր ՀԷԿ-երի միության նախագահ Նաիրա Նահապետյանը, սակայն, բացառել է նման վարկած։ «Առաջին լրատվական»-ի հետ զրույցում նա նշել է, որ էներգետիկ խափանումը չի բացառվում, որ եղանակի հետ կապված լինի, ինչը դեռ կպարզվի. «Իմ խորին համոզմամբ՝ ոչ մի դիվերսիա կամ հաքերային հարձակում չկա»։

Ինչ վերաբերում է ՀԷԿ-երի՝ նման խափանումների դեպքում արագ արձագանքմանը, ապա, ՀԷԿ-երի միություն նախագահի խոսքով՝ ամռանը երբ ոռոգում է սկսվում հանրապետությունում, բոլոր ՀԷԿ-երը, որ աշխատում են ազատ հոսքերի վրա, անջատվում են և ջուրն ամբողջովին տրամադրվում է ոռոգմանը. դա մոտավորապես 300-350 մգվտ հզորություն է։ Արդյունքում, նրա խոսքով, ՀԷԿ-երի մեծ մասը կանգնած է։

«Ընդամենը 74 ՀԷԿ է աշխատում ամառային սեզոնի ժամանակ։ Դրա համար հզորությունը քիչ էր։ Մենք պատրաստվեցինք, ամբողջ միությունը միացավ, որ ՀԷԿ-երը պետք է մտնեին ցանց և կարողանային բեռը վերցնել իրենց վրա։ Բայց փասռք Աստծո, որ պատկան մարմիններն արագ վերականգնեցին և այդ անհրաժեշտությունը չեղավ։ ՀԷԿ-երը միանգամից կմտնեին ցանց և կլրացնեին էլեկտրաէներգիայի պակասը, որը առաջացավ Հրազդանի ՋԷԿ-ի 5-րդ բլոկի և Երևանի ՋԷԿ-ի անջատվելու հետևանքով»,-հավելել է նա։

Հարցին, թե որքանով հնարավոր եղավ խնդրին արագ արձագանքել ու լուծում տալ, Նահապետյանը պատասխանել է. «Բավականին արագ լուծումը տվեցին։ Իհարկե, կարելի է ասել, որ արագ չի, քանի որ անգամ մեկ ժամ անջատումը բերել է մեծ խնդիրների, բայց բոլոր դեպքերում արագ կարողացան արձագանքել ու վերաբեռնավորել կայանները։ Եթե անգամ ՀԷԿ-երն էլ միանային, էլի կտևեր 2-3 ժամ, մինչև ամբողջ բեռը կարողանայինք վերցնել մեզ վրա։ Եթե դա երկար տևեր, մենք պատրաստ էինք, և կարծում եմ՝ կհրահանգավորվեր, ոռոգման գնացող ջրի պաշարները կդադարեցվեին, կտային ՀԷԿ-երին, որ նրանք 300 մգվտ հզորությամբ փակեին էլեկտրաէներգիայի պակասը»,-հավելեց Նահապետյանը։