Փորձում են կոծկել դատարաններն արգելափակելու գործողությունները. փաստաբան
Դատարանների մուտքերն ու ելքերն արգելափակելու օրը գրանցված միջադեպերի վերաբերյալ քրեական գործի հարուցումը մերժելով փորձ է կատարվում կոծկել այն ամենը, ինչ տեղի ունեցավ Հայաստանում մայիսի 19–ին և 20–ին։ Նման կարծիք NEWS.am–ի հետ զրույցում հայտնեց փաստաբան Միհրան Պողոսյանը՝ անդրադառնալով ՀՔԾ–ի՝ քրեական գործի հարուցումը մերժելու որոշմանը։
Նշենք, որ Միհրան Պողոսյանի՝ դատարաններն արգելափակելու վերաբերյալ ահազանգի մասին մամուլի հրապարակումները դատախազության կողմից դիտվել էին որպես հանցագործության մասին հաղորդում և կցվել մայիսի 20–ին գրանցված միջադեպերի փաստի կապակցությամբ նախապատրաստված նյութերին։
Միհրան Պողոսյանը նշեց, որ նյութերի նախապատրաստման ընթացքում ՀՔԾ–ն անգամ փորձ չի կատարել որպես միջադեպի մասնակից իրենից բացատրություն վերցնել։
«Դատարաններն արգելափակելու գործընթացը սկսելուց առաջ էլ իրավապահները գիտեին, թե այդ գործընթացն ինչպես կհանգուցալուծվի»,–ասաց նա՝ նշելով, որ իր համար սպասելի էր ՀՔԾ–ի որոշումը։
Փաստաբան Լուսինե Ավագյանը, որը նույնպես այդ դեպքերի կապակցությամբ հանցագործության մասին հաղորդում էր ներկայացրել, ասաց, որ դեռ չի ստացել քննիչի որոշումը, սակայն հետամուտ է լինելու՝ պարզելու, թե ինչ հիմքով է մերժվել այն։
Փաստաբանը նշեց, որ իրեն նույնպես չեն հրավիրել հարցաքննության։
«Նման դեպքերում, երբ անձը հանցագործության մասին հաղորդում է ներկայացնում, նրան կանչում են, հարցաքննում, իսկ այս դեպքում՝ քար արհամարհանք էր»,–ասաց նա։
Ավելի վաղ հայտնել ենք, որ դատարանների մուտքերն ու ելքերն արգեփակելուն ուղղված գործողությունների ընթացքում կատարված առերևույթ հանցագործության վերաբերյալ 5 նյութ ՀՀ դատախազությունն ուղարկել էր Հատուկ քննչական ծառայություն։ Մայիսի 3–ին ՀՔԾ–ն որոշել է մերժել քրեական գործի հարուցումը՝ հանցադեպի բացակայության հիմքով։
Նշենք, որ հաղորդումներից մեկը ներկայացրել էր Վարչական դատարանի դատավոր Անի Հարությունյանը, մյուսը՝ ՍԴ աշխատակազմի ղեկավարը։ Եվս երեք նյութ վերաբերում է փաստաբաններ Միհրան Պողոսյանի, Հրանտ Անանյանի եւ Լուսինե Ավագյանի աշխատանքը խոչընդոտելուն։
Հիշեցնենք, որ մայիսի 20–ի առավոտից Նիկոլ Փաշինյանի կոչով քաղաքացիները արգելափակել էին Հանրապետության բոլոր դատարանների մուտքերը և ելքերը։ Կեսօրին վարչապետը կառավարությունում խորհրդակցություն անցկացրեց դատական համակարգում տիրող իրավիճակի կապակցությամբ և ասաց, որ եկել է «վիրահատական միջամտություններ» իրականացնելու ժամանակը։