ՀՅԴ-ականների ակցիան դադարեցվեց

ՀԱԿ ակտիվիստ Վարդան Հարությունյանին ծեծելու միջադեպի մասնակից լինելու կասկածանքով ոստիկանության բաժին բերման ենթարկված ՀՅԴ–ական Յուրա Հովհաննիսյանը ազատ արձակվեց Կենտրոնի ոստիկանությունից, նրա նկատմամբ խափանման միջոց է ընտրվել չհեռանալու ստորագրությունը: Այս մասին լրագրողներին հայտնեց ՀՅԴ Հայաստանի Գերագույն մարմնի անդամ Արծվիկ Մինասյանը, որը այլ դաշնակցականների նման այսօր ոստիկանություն էր գնալու՝ հայտնելու որ ինքն է ծեծել Վարդան Հարությունյանին։

Նշենք, որ ՀԱԿ ակտիվիստ Վարդան Հարությունյանը հաղորդում էր տվել ոստիկանությանը, որ անհայտ անձինք իրեն ծեծի են ենթարկել, այնուհետեւ նա հայտարարել էր, որ այդ անձինք ՀՅԴ անդամներն են: ՀՅԴ–ականների նախաձեռնած յուրօրինակ ակցիայի շրջանակում դաշնակացականներն այսօր հերթով գալիս եւ հայտնում էին ոստիկանությանը, որ իրենք են ծեծել Վարդան Հարությունյանին:

Նշենք, որ ՀՅԴ Հայաստանի Գերագույն մարմնի անդամ Արծվիկ Մինասյանը Կենտրոնի ոստիկանությունում գտնվող ՀՅԴ անդամներին հորդորում էր ցուցմունք չտալ, եւ ավելորդ չծանրաբեռնել ոստիկանությանը:

«Մենք ինֆորմացիա ունենք, որ մարզերում սկսվում են ինքնաբուխ հավաքներ: Մարդիկ այցելում են տարբեր ոստիկանական բաժանմունքներ, եւ հայտարարում, որ այդ երեւույթի հետ կապված գործողությանը ամեն մեկն ինքն է մասնակցել: Այս ակցիան կարող է լայն տարածում ունենալ, կարող է նաեւ շատ բացասական հետեւանքներ ունենալ, ուստի ես կոչ եմ անում մեր քաղաքացիներին, ովքեր ձգտում են իրենց խոսքն ասելու, խնդրում ենք հնարավորություն տալ, որպեսզի ոստիկանությունը կարողանա իր գործողությունները հավուր պատշաճի իրականացնիել: Ավելորդ ցուցմունքներով էլ չծանրաբեռնենք ոստիկանությանը»,- ասաց նա:

Հիշեցնենք, որ հունիսի 3–ին ՀԱԿ ակտիվիստ Վարդան Հարությունյանը Facebook-ի իր էջում գրառում էր արել, որ աշխատավայրի մոտ իրեն ծեծի են ենթարկել, մինչ այդ էլ, մի քանի օր առաջ ծեծել են տան մոտ: Նա նաեւ լուսանկար էր հրապարակել բռնության հետքերով:

Հարությունյանը հաղորդում է տվել, որ նույն օրը, ժամը 13.30-ին, շենքի բակում անհայտ անձինք ձեռքերով հարվածներ են հասցրել իր դեմքին եւ գլխին՝ պատճառելով վնասվածք:

Վարդան Հարությունյանի հետ կապված միջադեպով ոստիկանությունում հարուցվել է քրեական գործ՝ ՀՀ քրեական օրենսգրքի 118 հոդվածի հատկանիշներով:

Նշենք, որ այսօր՝ հունիսի 4-ին, միջադեպի մասնակից լինելու կասկածանքով ոստիկանության բաժին բերման էր ենթարկվել ՀՅԴ–ական Յուրա Հովհաննիսյանը։ Քաղաքացուն բերման ենթարկելու ոստիկանության հաղորդագրությունից հետո «Երկիր մեդիա» հեռուստաընկերության լրատվական եւ հասարակական-քաղաքական հաղորդումների տնօրեն, ՀՅԴ–ական Գեղամ Մանուկյանը եւ այլ դաշնակցականներ Facebook սոցիալական ցանցում գրառումներ էին կատարել՝ հայտնելով, որ իրենց վրա են վերցնելու ՀԱԿ ակտիվիստին ծեծելու պատասխանատվությունը: