Դատաիրավական համակարգի ցնցումների հետևանքները. Դավիթ Սանասարյանը հանդես է եկել հայտարարությամբ

Դավիթ Սանասարյանը հանդես է եկել հետևյալ հայտարարությամբ.

«Հաշվի առնելով օրերս վարչապետ Փաշինյանի կողմից բարձրացված դատական իշխանության նկատմամբ անվստահության հարցը, ինչպես նաև իմ համընկնող քաղաքական դիրքորոշումը՝ որոշել ենք.

դատախազության կողմից կայացրած իմ նկատմամբ ապօրինի քրեական հետապնդումը վերացնելու միջնորդության մերժման որոշումը չբողոքարկել ՀՀ դատական ատյաններում։

Վստահ եմ, որ մինչև արդարադատության ոլորտում առաջացած ճգնաժամը չստանա իր տրամաբանական հանգուցալուծումը, այն է՝ վարչապետի կողմից նշված միջոցառումները չիրականացվեն հավուր պատշաճի, և մենք չունենանք լեգիտիմ, հասարակության վստահությունը վայելող և արդար դատարան, այն չի կարող
հանդիսանալ անձի խախտված իրավունքները վերականգնող մարմին»։

Դավիթ Սանասարյանի նկատմամբ շատ լուրջ քրեական գործ է հարուցված: Այս
հայտարարությունը կարելի էր դիտարկել որպես սկզբունքայնության դրսևորում, եթե չլիներ մի բայց... Իսկ բայցը կայանում է նրանում, որ Սանասարյանը պարզապես չէր կարող բողոքարակել դատախազի որոշումը: Քրեական հետապնդումը դադարեցնելու պաշտպանական կողմի միջնորդության մերժումը դատական կարգով կարող է բողոքարկվել միայն որոշակի հանգամանքների առկայության դեպքում՝ եթե քրեական հետապնդումը պետք է դադարեցվեր վաղեմության ժամկետի կամ համաներման ակտի անտեսման հիմքով: Իսկ ինչպես գիտենք Սանասարյանի գործով ոչ վաղեմության
ժամկետն է լրացել, ոչ էլ համաներման ակտ կա: Մնացած դեպքերում քրեական հետապնդումը դադարեցնելու միջնորդությունը դատական կարգով չի կարող բողոքարկվել, քանի որ նախաքննության փուլում գտնվող գործով բողոքը քննող դատարանը պետք է գործը քննի ամբողջությամբ, որպեսզի համոզվի քրեական հետապնդումը դադարեցնելու հիմքերի բավարարության մեջ: Իսկ դա արդեն
վերածվում է դատական քննության:

Սանասարյանի այս քայլն իսկապես սկզբունքային կլիներ, եթե այսքան մանիպուլյացիոն չլիներ: Սանասարյանը երեկ վերոհիշյալ հայտարարությունն է տարածել, մի
քանի օր առաջ դատարանի շենքերն էր արգելափակում եւ այդ մասին հայտարարություն անում: Սա ոչ այլ ինչ է, քան դատաիրավական համակարգում սկսված ամենաթողություն: Իսկ ի՞նչ է սպասվում երկրին, եթե բոլոր նրանք, ում գործը դատարանում է նման հայտարարություն անեն և որոշեն արգելափակել դատարանների
շենքերը կամ պնդեն, որ դատարան չեն մտնի, մինչեւ դատավորների
որոշումները չբխեն ժողովրդի մեծամասնության կամքից: Հայաստանում սկսվում է դատաիրավական համակարգի քաոս, որը եթե չդադարեցվի, ապա հանգեցնելու է ծանր հետևանքների:

«Ազատ միտք եւ ազատ խոսք»