Կամբոջայում հայտնաբերել են VI-IX դարերի ավելի քան 100 տաճարների մնացորդները

Կամբոջայի
Գիտությունների ակադեմիայի Արվեստի եւ մշակույթի ինստիտուտի հնագետները
հայտնաբերել են երկրի արեւելքում՝ Կրատյեհ նահանգում, VI-IX դարերի ավելի
քան 100 հնագույն հնդուական տաճարներ, հաղորդում է ՌԻԱ Նովոստի-ն՝ հղում կատարելով Phnom Penh Post-ին:

Հայտնաբերված 100 տաճարներից եւ ոչ մեկն ավելի վաղ հայտնի չէր, ասվում է
հաղորդագրության մեջ. ոչ XX դարի սկզբում ֆրանսիական հնագիտական
արշավախումբը, ոչ ավելի ուշ ժամանակաշրջանի կամբոջական
ուսումնասիրությունները չեն գրանցել այդ գտածոներն այդ վայրերում, որոնք
հիմնականում Չենլա կայսրության ժամանակաշրջանի կառույցներ են:

 «1902-1911
թթ. Ֆրանսիացիները հայտնաբերել էին այդ վայրերում ավելի քան 10 հնագույն
տաճարների փլատակները: Նահանգի մշակույթի բաժնի արշավախումբն այնուհետեւ
հայտնաբերել էր եւս 50 տաճարների մնացորդները: Իսկ մեզ հաջողվել է գտնել
այստեղ 100 հնագույն տաճարներ»,-պարբերականին հայտնել է Ինստիտուտի
փոխտնօրեն եւ հնագիտական արշավախմբի ղեկավար Թհոի Չանթհունը: Նա հավելել է,
որ հայտնաբերված տաճարները նվիրված են բրահմայական եւ հնդուական
աստվածներին, քանի որ Չենլա կայսրության ժամանակաշրջանում գերիշխող կրոնը
վաղ հինդուիզմն էր: Արշավախմբի ղեկավարը հայտնել է թերթին, որ Ինստիտուտը
մշակում է ծրագիր հայտնաբերված հնագիտական հուշարձաններից յուրաքանչյուրն
ավելի մանրակրկիտ ուսումնասիրելու ուղղությամբ, որը կիրագործվի մի քանի
տարիների ընթացքում:

Չենլա պետությունն իր ծաղկման ժամանակ զբաղեցրել է ժամանակակից
Կամբոջայի, Լաոսի, Թաիլանդի եւ Վիետնամի զգալի տարածքները: Մ.թ. IX դարում
Չենլան գրավվել էր Անգքոր կայսրության կողմից, որը գոյություն ուներ մինչեւ
XIV դարը եւ իր փլուզումից հետո սկիզբ էր տվել նոր ինքնուրույն
պետությունների զարգացմանն, որոնք ձեւավորվել էին այդ տարածքում:

Հենց Չենլայի թագավորներն էին Հարավ-Արեւելյան Ասիայի պատմության մեջ
առաջին անգամ ընդունել եւ տարածել իրենց կալվածքներում միապետ-կուռքի հին
հնդկական հայեցակարգը, հնդուական Վիշնու աստծո եւ նրա երկրային ավատար
Ռամայի մարմնացումը, որն այնուհետեւ դարձել էր Անգքորի հիմնական
գաղափարախոսությունն ու հասել մինչեւ մեր օրերը Հարավ-Արեւելյան Ասիայի
հետանգքորյան միապետությունների թագավորական ծիսակարգերում՝ Կամբոջայում,
Սիամեում, որը ներկայիս Թաիլանդն է, եւ Լաոսում, որն ուներ թագավորության
կարգավիճակ մինչեւ 1975 թվականը: