Ֆլորայի ու ֆաունայի շուրջ մեկ միլիոն տեսակներ անհետացման եզրին են

Ֆլորայի ու ֆաունայի
շուրջ մեկ միլիոն տեսակներ անհետացման եզրին են: Բազմաթիվ կենդանիներ եւ
բույսեր կարող են անհետանալ արդեն առաջիկա տասնամյակներում: Այդ մասին
ասվում է Կենսաբազմազանության եւ էկոլոգիական համակարգերի հարցերով
գիտաքաղաքական միջկառավարական հարթակի նոր զեկույցում, որի շուրջ 3 տարվա
ընթացքում աշխատել է 145 գիտնական 50 երկրներից:

ՅՈՒՆԵԿՕ-ի գործադիր տնօրեն Օդրի Ազուլեն անվանել է այդ փաստաթուղթը
որպես նախազգուշացում ամբողջ աշխարհի համար: «Այդ պատմական զեկույցի
հրապարակումից հետո ոչ ոք չի կարողանա պնդել, որ ոչինչ չգիտեր այդ խնդրի
մասին: Մենք այլեւս չենք կարող թույլ տալ մեզ ոչնչացնել կյանքի
բազմազանությունը: Մենք պատասխանատու ենք ապագա սերունդների
առջեւ»,-հյատարարել է Օդրի Ազուլեն:

Նա
նշել է, որ նոր հետազոտությունը հիշեցում է համաշխարհային էկոլոգիական
ժառանգությունը պահպանելու համար անհապաղ միջոցներ ձեռնարկելու
անհրաժեշտության մասին:

Զեկույցի հեղինակները հիշեցրել են, որ բույսերն ու կենդանիները օգնում
են մարդկանց պահպանել առողջությունն ու ծառայում են որպես մոլորակի
բարեկեցության աղբյուր:

Մինչդեռ վերջին տարիներին նկատվում է կենսաբազմազանության կորստի
աննախադեպ արագ տեմպ: 1900 թվականից ի վեր տեղի ֆլորայի ու ֆաունայի
տեսակների քանակը կրճատվել է առնվազն 20 տոկոսով: Փորձագետները տագնապով են
հայտնում ձկնային պաշարների, բազմաթիվ փոշոտիչների եւ հողի օրգանիզմների
անհետացման մասին:

2016 թվականին անհետացել է տնայնացված բոլոր կաթնասունների ավելի քան 9 տոկոսը:

«Կենսաբազմազանության կորուստը մարդկային գործունեության ուղղակի
արդյունքն է եւ լրջորեն սպառնում է ամբողջ աշխարհում մարդկանց
բարեկեցության վրա»,-հայտարարել է զեկույցի հեղինակներից մեկը՝ պրոֆեսոր
Սեթելեն:

Գիտնականները սահմանել են հինգ հիմնական գործոններ, որոնք առավելագույն
չափով են ազդում կենսաբազմազանության վրա՝ հողի եւ ծովի շահագործման
մեթոդների փոփոխություն, օրգանիզմների չափազանց մեծ շահագործում, կլիմայի
փոփոխություն, շրջակա միջավայրի աղտոտում եւ ինվազիվ խորթ տեսակների
տարածում: