Մենք կամակատար չենք դառնա, մենք ունենք մեր հեղինակությունը, մեր իմիջը. ԵԿՄ փոխնախագահ
Կցորդը այն է, որ դառնում են կամակատար, իսկ մենք կամակատար չենք դառնա, մենք ունենք մեր հեղինակությունը, մեր իմիջը։ Այս մասին News.am-ի հետ զրույցում ասաց ԵԿՄ փոխնախագահ Մանվել Եղիազարյանը, խոսելով ԵԿՄ-ն քաղաքականացնելու եւ կցորդ դառնալու մասին լուրերին։
Նրա խոսքով՝ ԵԿՄ վարչությունը Պաշտպանության նախարարության հետ համագործակցելու է, լսելու է բոլորի հորդորները, բայց կամակատար դառնալ չի պատրաստվում. «Մենք համագործակցելու ենք բոլորի հետ՝ հանուն մեր հայրենիքի բարեկեցության։ Ընտրության ժամանակ ամեն մեկն իր իրավունքն է ունենալու՝ ում ձայն տա, կամ ում չընտրի, անդամները ունեն իրենց իրավունքները, իրենք ազատ քաղաքացիներ են»:
Անդրադառնալով մամուլում տարածված այն լուրին՝ որ ԵԿՄ վարչության ներսում պառակտում է, Եղիազարյանն ասաց, որ կա նման վտանգ, եւ իրենք ամեն ինչ անում են, որպեսզի հնարավորին չափ շատ մարդկանց համախմբեն իրենց շուրջ։
«Ամբողջ հասարակությունն է պառակտված Հայաստանում, չկա մի կառույց, որ պառակտված չլինի, եւ դրանից անմասն չէ նաեւ երկրապահը։ Մենք դրա համար, որքան հնարավոր է, շատ մարդկանց ենք համախմբում մեր շուրջը»,- ասաց նա։
Հարցին՝ Մանվել Գրիգորյանի ԵԿՄ անդամ լինելը քննարկվում է, թե՝ ոչ, Եղիազարյանն ասաց՝ երբ կավարտվի Մանվել Գրիգորյանի քրեական գործը, այն ժամանակ կանցկացնեն քննարկումներ. «Այդ ժամանակ էլ կհասկանանք՝ թողնե՞լ նրան մնալ ԵԿՄ-ում, թե՝ ոչ»։