Մինչեւ 2100-ը Ալպերը կարող են զրկվել բոլոր սառցադաշտերից եւ լեռնադահուկային հանգստավայրերից

Ալպյան լեռները գլոբալ ջերմացման պատճառով կզրկվեն գրեթե բոլոր սառցադաշտերից եւ «բազմամյա» ձյան պաշարներից հարյուրամյակի ավարտին, ընդ որում՝ դրանց մեծ մասը կանհետանա անկախ մարդկության հետագա գործողություններից, տեղեկացնում է ՌԻԱ «Նովոստի»-ն՝ հղում կատարելով Cryosphere ամսագրում կլիմայաբանների հրապարակած հոդվածին։

«Եթե ամենահոռետեսական սցենարը վերցնենք, Ալպյան լեռները լրիվ կզրկվեն սառցադաշտերից մինչեւ 2100 թվականը։ Կմնան միայն սառցածածկի փոքրիկ պատառիկներ ամենամեծ բարձրություններում, որի ծավալը կկազմի ալպյան ընթացիկ սառույցների պաշարների մոտ 5 տոկոսը»,- պատմում է Մաթիաս Հուսը (Matthias Huss) Շվեյցարիայի Դաշնային պոլիտեխնիկական ինստիտուտից (Ցյուրիխ)։

Երկրի կլիման ուսումնասիրող գիտնականների մեծ մասն այսօր չի կասկածում, որ գլոբալ ջերմացումը գոյություն ունի եւ այն արմատապես կփոխի մոլորակի կերպարը, եթե ջերմաստիճանի բարձրացումը չհաջողվի կասեցնել Ցելսիուսի 1,5 աստիճան նիշում։ Հօգուտ սրա են վկայում տասնյակ կլիմայական արբանյակների, հազարավոր օդերեւութաբնական կայանների ու ծովերում լողանների չափումները եւ մոլորակի կլիմայի համակարգչային հարյուրավոր մոդելները։

Դրանցից առաջինը կտուժեն, ինչպես ցույց են տալիս տեսական մոդելներն ու արբանյակային եւ ցամաքային համակարգերի չափումները, անդրբեւեռային լայնություններն ու լեռնային սառցադաշտերը, որտեղ ջերմաստիճանն արդեն հիմա Ցելսիուսի 4-9 աստիճանով բարձր է անցած դարերի նորմայից։ Սառույցների, ձյան ու հավերժական սառածության հալվելը ոչ միայն արմատապես կփոխի մոլորակի այդ անկյունների էկոհամակարգը, այլեւ կարագացնի գլոբալ ջերմացումը։