Ժամկետային զինվորների պատրաստման ժամկետը ևս 7 ամսով երկարացնելու առաջարկը պատգամավորները մերժեցին
Մեր նախաձեռնած օրինագիծը շատ կարեւոր է եւ ուղղված է նրան, որպեսզի էապես բարձրանա Հայաստանի Զինված ուժերի անձնակազմի մարտական պատրաստվածությունը։ Այս մասին ապրիլի 9-ին Պաշտպանության եւ անվտանգության խորհրդարանական հանձնաժողովի նիստում, «Զինվորական ծառայության եւ զինծառայողների կարգավիճակի մասին» օրենքում փոփոխություններ մտցնելու օրինագծի քննարկման ժամանակ, ասաց «Բարգավաճ Հայաստան» կուսակցությունից Ազգային ժողովի փոխնախագահ Վահե Էնֆիաջյանը։
Նրա խոսքով՝ այդ փոփոխությունները թույլ կտան պահպանել բազմաթիվ մարդկային կյանքեր։ «Օրինագծի էությունը հետեւյալն է։ Մենք կարծում ենք, որ երիտասարդները, որոնց 18 տարին լրացել է, պետք է մարտական հերթապահություն անցնեն, առնվազն, համապատասխան բազմակողմանի ռազմական պատրաստություն անցնելուց մեկ տարի հետո, երբ ստացած կլինեն համապատասխան պատրաստություն, փորձառություն եւ փորձ։ Մենք կարծում ենք, որ 18 տարին չափազանց երիտասարդ տարիք է, որպեսզի մարտական հերթապահություն իրականացվի»,- բացատրել է Էնֆիաջյանը՝ հավելելով, որ այդ հարցին պետք է մոտենալ ավելի լուրջ եւ պրոֆեսիոնալ։
Պատգամավորը, մասնավորապես, նշել է, որ բանակում բավական բարձր են մահացության ցուցանիշը, հատկապես ժամկետային զինծառայողների շրջանում, եւ ծանրության տարբեր աստիճանի վնասվածքներ հասցնելը։
Նրա խոսքով՝ վերջին երկու տարում տարբեր պատճառներով Զինված ուժերում զոհվել է 111 զինծառայող, այդ թվում նաեւ «անհայտ պատճառներով»։ Էնֆիաջյանը նշել է նաեւ, որ ուսումնասիրել է տարբեր երկրների փորձը, հատկապես Իսրայելինը։
Օրենսդրական նախաձեռնությունն առաջ է բերել ոչ միանշանակ արձագանք մշտական հանձնաժողովի անդամների շրջանում։ Պատգամավորները, մասնավորապես, հետաքրքրվել են Էնֆիաջյանից, թե ունի արդյոք ինչ-որ կոնկրետ հետազոտություն այս հարցով, արդյոք դա հարված չի հասցնի սահմանին մարտական հերթապահության ապահովման որակին, եւ նշել են, որ Իսրայելի եւ Հայաստանի բանակների համեմատությունը, շատ պատճառներով, պարզապես կոռեկտ չէ։
Իր հերթին, Հայաստանի պաշտպանության փոխնախարար Գաբրիել Բաբայանն ասաց, որ զինվորական պատրաստության եւ անձնակազմում, մասնավորապես՝ ժամկետային զինծառայողների շրջանում ինքնասպանությունների վիճակագրության միջեւ կապ չկա, իսկ այդ տեղեկությունը չի համապատասխանում իրականությանը։ Ավելին, նրա հավաստմամբ, ինքնասպանությունների ցուցանիշն ավելի քան մեկ տարի ծառայած ժամկետային զինծառայողների շրջանում էապես ավելի բարձր է, քան նորակոչիկներինը։
Արդյունքում՝ օրինագիծը բացասական եզրակացություն ստացավ։