Կարճաժամկետ հեռանակարում հնարավոր է լինի մթերման խնդիր. «Իմ քայլի» պատգամավորը՝ «Սպայկայի» մասին
Մենք բոլորս պետք է ձգտենք նրան, որ չլինեն արտոնյալներ։ Այս մասին այսօր՝ ապրիլի 9-ին, ԱԺ-ում լրագրողների հետ զրույցում հայտարարեց «Իմ քայլը» խմբակցության պատգամավոր Արտակ Մանուկյանը՝ պատասխանելով «Սպայկա» ընկերության մասին հարցին:
«Եթե մենք խոսում ենք մի երեւույթի մասին, ինչը հարկային պարտավորությունները պատշաճ ձեւով կատարելն է, եւ հարկային պարտավորությունների չկատարելու դեպքում, երբ դա բացահայտվում է, ինչ-ինչ սուբյեկտներ ասում են՝ մենք կդադարեցնենք մեր գործունեությունը, այո՛, սա շանտաժ է եւ առնվազն անազնիվ վարգածիք է բոլոր այն պատշաճ հարկ վճարողների նկատմամբ, որոնք այդ շուկաներում գործում են եւ իրենց ձեւով պատշաճ հարկեր են վճարում։
Հիմա պատշաճ հարկեր վճարողներն էլ պետք է դուրս գան, ասեն, ինչո՞ւ մենք պետք է օրենքին հետեւենք։ Տնտեսվարողները պետք է հետեւեն իրենց ստանձնած պարտավորությունները եւ սա խաղի կանոններ են եղել բոլորի համար։ Եթե նախորդ իշխանությունների օրոք հնարավորություններ են եղել շրջանցել այդ խաղի կանոնները, ներկա իշխանությունը չի հանդուժի նման վարքագիծ»,–ասաց նա։
Լրագրողների նկատառմանը, թե արդյոք այժմ «Սպայկան» պատժվում է նախկին խաղի կանոններով գործելու համար, պատգամավորն արձագանքեց. «Նույն ձեւով կարելի է խոսել «Երեւան Սիթի» առեւտրային ցանցի եւ ԱԱԾ-ի պատմության մասին, մենք պատժեցինք, նույն տրամաբանությամբ կարող ենք տեղայնացնել այստեղ։ Բայց այս խաղի կանոնները եղել են օրենսդրությունից շեղվող, հիմա մենք ի՞նչ ենք ուզում՝ խաղի կանոններ՝ համաձայնությունների՞ հիման վրա, թե՞ օրենսդրությունից բխող խաղի կանոններ»։
Նա շեշտեց՝ բոլորը պետք է հետեւեն օրենսդրության վրա հիմնված խաղի կանոններին. «Կարծում եմ, որ մենք բոլորս պետք է ձգտենք նրան, որ չլինեն արտոնյալներ եւ լինեն օրենսդրության հիման վրա խաղի կանոններին հետեւողներ: Սա, ի դեպ, չափազանց կարեւոր է երկրի մրցունակության բարձրացման համար, որովհետեւ երբ խաղի կանոնները թափանցիկ են, այնն ներդրողը, որին հետաքրքիր չէ, թե ով է այս պահին կառավարությունը, վերցնում ու նայում է օրենքը, այն ներդրողը, որին հետաքրքրում է, թե ով է կառավարությունը, նա իրոք փնտրում է խաղի կանոնները»:
Արտակ Մանուկյանը նաեւ նշեց, որ այժմ գծվում է կարմիր գիծը, որը չպետք է հատեն ընկերությունները եւ փորձ է արվում խաղի կանոններ սահմանել բոլորի համար:
Նա համոզված է՝ «Սպայկայի» հետ տեղի ունեցածը կարող է լավ ազդակ լինել ներդրողների համար, որոնք ցանկանում են օրենքի հիման վրա ստանալ մրցակցային առավելություններ. «Այն ներդրողը, որը փնտրում է իրոք օրենքով պաշտպանված եւ հարկային պարտավորությունների կատարման վրա հիմնված մրցակցային առավելություն, կարծում եմ՝ որեւէ մտահոգություն չպետք է ունենա։
Արտակ Մանուկյանը կարծում է, որ կարճաժամկետ հեռանակարում հնարավոր է մթերման խնդիր լինի, սակայն երկարաժամկետ հեռանկարում կստեղծվի մրցակցային դաշտ։
Նշենք, որ ապրիլի 8-ին Երեւանի ընդհանուր իրավասության դատարանի դատավոր Կարեն Ֆարխոյանը որոշում կայացրեց բավարարել ՊԵԿ քննչական վարչության միջնորդությունն ու երկու ամսով կալանավորել «Սպայկա» ընկերության տնօրեն Դավիթ Ղազարյանին:
Հիշեցնենք, որ առանձնապես խոշոր չափերով հարկերը չվճարելու դեպքի կապակցությամբ հարուցված քրեական գործի շրջանակում 2019թ. ապրիլի 4-ին Ղազարյանին մեղադրանք է առաջադրվել ՀՀ քրեական օրենսգրքի 205-րդ հոդվածի 2-րդ մասի (առանձնապես խոշոր չափերով hարկ, տուրք կամ պարտադիր այլ վճար չվճարելը) հատկանիշներով։
Ըստ ՊԵԿ հաղորդագրության՝ «Սպայկա» ընկերությունը պետական բյուջե չի վճարել ընկերության կողմից իրականացված ձեռնարկատիրական գործունեության արդյունքում առաջացած 7 036 666 312 ՀՀ դրամ մաքսատուրք եւ հարկ:
«Սպայկա» ընկերության աշխատակիցները դուրս են եկել բողոքի ցույցի՝ ընդդեմ տնօրենի կալանավորման։