Առ այսօր Սեքյուրիթի Դրիմի Սաշիկի տան գազի և էլ. սպառման համար գումարը վճարում է այս ընկերությունը, իսկ իրականում՝ ՃՈ-ն

«Սեքյուրիթի Դրիմ» ՍՊ ընկերության մասնակիցներ Ալեքսան և Գուրգեն Զաքարյանները շատ պատահաբար, իրենց կողմից շահագործվող ավտոմեքենաները գնել են Սեքյուրիթի Դրիմ ՍՊԸ-ի հաշվին և մինչև իրավապահների կողմից քրեական գործ հարուցելը և ստուգումներ սկսելը / 2018 թվականի հունիս ամիսը/ ավտոմեքենաները հաշվառված էին Սեքյուրիթի Դրիմի անվամբ: Սեքյուրիթի Դրիմը ուներ 1 Range Rover, 1 Mercedes Benc, 1 Nissan, 1 Masda /բոլորն էլ 2016 թվականի արտադրության/ որոնք շահագործվում էին համապատասխանաբար Գուրգեն Զաքարյանի, Ալեքսան Զաքարյանի, Գ. Զաքարյանի աղջկա՝ Նունե Զաքարյանի և փեսայի, տղայի՝ Մուշեղ Զաքարյանի կողմից, որոնցից վերջին երեքը որևէ առնչություն չեն ունեցել Սեքյուրիթի Դրիմի հետ: Առնչություն չեն ունեցել, բայց… հայրիկի՝ պետության հաշվին շռայլությունները չեն ավարտվում մեքենաներով, Բաղրամյան պողոտա 59 հասցեում գտնվող շենքի բնակարանը և երկու ավտոկայանատեղիները ձեռք են բերվել Սեքյուրիթի Դրիմ ՍՊԸ-ի հաշվին, գտնվում են ընկերության հաշվեկշռում, վերանորոգվել են ընկերության հաշվին, բայց այդ բնակարանում են ապրում Նունե Զաքարյանը և ամուսինը:

Ի դեպ, գազի և էլ. Էներգիայի ծախսերը ևս հատուցվում են Սեքյուրիթի Դրիմի հաշվին (իրականում՝ ՃՈ-ի հաշվին): Ավագ եղբորից հետ չի մնացել նաև Ալեքսան Զաքարյանը (Սաշիկը, ինչպես ինքն է իր մասին սիրում ասել, հավանաբար մտովի նույնացնելով այլ հայտնի Սաշիկի հետ) 2014 թվականին կնքված կառուցապատման պայմանագրով, հնարամիտ Ա. Զաքարյանը Քանաքեռում գտնվող իր սեփական հողամասը կառուցապատման իրավունքով տրամադրել է Սեքյուրիթի Դրիմին, և ընկերությունը ծախսելով ավելի քան 800 000 000 (ութ հարյուր միլիոն) ՀՀ դրամ, իրականացրել է Սաշիկի տան շինարարությունը, վերանորոգումը, կահավորումը և Սեքյուրիթի Դրիմի (ՃՈ-ի) հաշվին ամիսներ շարունակ պահել է նաև դենդրոլոգ, ով պատասխանատու էր խոտածածկույթի համար:

Այդ շքեղ վերանորոգված, հատուկ պայմանների ապահովմամբ ձևավորված տանը ապրում են Ալեքսան Զաքարյանը՝ ընտանյոք, թեև փորձում են ներկայացնել, թե դա ընկերության գրասենյակն է: Առ այսօր, Սաշիկի տան գազի և էլ. սպառման համար գումարը վճարում է Սեքյուրիթի Դրիմը (իրականում՝ ՃՈ-ի հաշվին): Կասեն, էհ մարդ են, թող տուն սարքեն, ապրեն, ում են խանգարում: Թող սարքեն, բայց իրենց հաշվին, ապրեն իրենց արդար աշխատանքով, ոչ թե խաբեությամբ՝ պետության հաշվին, պակաս վճարված հարկերի գնով:

Այդ ծախսված գումարների ԱԱՀ-ն (20 տոկոսը) Սեքյուրիթի Դրիմ ՍՊԸ-ն հաշվանցել է… և ընկերության հաշվին շինարարություն անելով, փաստացի նվազեցրել է հարկվող շահույթը:

Ի դեպ խաբեության մասով. 2017 թվանակի հունիս ամսից մինչև 2018 թվականի հունիս ամիսը (մոտ մեկ տարի) Գուրգեն և Ալեքսան Զաքարյանները, գրանցված են եղել Սեքյուրիթի Դրիմ ՍՊԸ-ում որպես տնօրենի խորհրդականներ՝ յուրաքանչյուրը մեկ միլիոն ՀՀ դրամ աշխատավարձով և այս խաբեությունը ընդատվեց քրեական գործի հարուցմամբ և արագ կարգով 2018-ի հունիսին լուծվեցին նրանց հետ կնքված պայմանագրերը: