Կապ չի՞ եղել, չկա՞ նման բան (լուսանկար)

 Պետեկամուտների կոմիտեի ամենահաս ձեռքը բռնեց «Սպայկա» ընկերության կոկորդը... Երեկ ՊԵԿ-ն դատարան միջնորդություն ներկայացրեց՝ «Սպայկա» ընկերության  տնօրեն Դավիթ Ղազարյանին կալանավորելու համար՝ պետությանը 7 միլիարդ դրամի վնաս հասցնելու կասկածանքով: Վերջինս հասցրեց որոշ պարզաբանումներ տալ ԶԼՄ-ներին՝ հրավիրելով մամլո ասուլիս:

Լրագրողներին հուզող հարցերից մեկն էլ ՀՀ երկրորդ նախագահ Ռոբերտ Քոչարյանի և երրորդ նախագահ Սերժ Սարգսյանի փեսա Միքայել Մինասյանի կապ ունենալ-չունենալն էր իր տնօրինած ընկերության հետ։

«Ռոբերտ Քոչարյանի մասով կապ չի եղել և չկա նման բան, էդ լուրերը երևի 8 տարի առաջ են պտտվել ԶԼՄ-ներում, որոնց մենք չենք պատասխանել, ասել ենք` դե, գրում են, գրում են»,- պարզաբանեց Դավիթ Ղազարյանը։

Բայց հայտնի ճշմարտություն է՝ ժողովուրդը լա՛վ հիշողություն ունի: Ընդամենը 2 տարի առաջ ՀՀ երրորդ նախագահ Սերժ Սարգսյանն աշխատանքային այցով «Սպայկա» ընկերություն գնաց: 

Նա եղավ «Վոլվո» ընկերության բեռնատարների տեխսպասարկման նորագույն սարքավորումներով հագեցած կենտրոնում և «Սպայկա»-ի հյութերի ու պահածոների արտադրության գործարանում՝ ծանոթացավ ընկերության ձեռքբերումներին, այդ թվում՝ արտահանման ծավալներին ու զարգացման ծրագրերին:

Արխիվային լուսանկարներն ուսումնասիրելիս մի շարք ծանոթ դեմքեր գտանք:

Հատկանշական է հատկապե՛ս Լևոն Արևշատյանի լուսավոր դեմքը: Հետաքրքիր է, թե ի՞նչ է անում նա այս այցի շրջանակներում, որպես ի՞նչ կամ որպես ո՞վ է ներկա տվյալ միջոցառմանը: Գուցե որպես ընկերության իրական սեփականատիրոջ ներկայացուցի՞չ...

Ախր, Դավիթ Ղազարյանը հստակ ասաց՝ «կապ չի եղել, չկա՛ նման բան»: