«Իմ քայլը» խմբակցության անդամ լինելը չի նշանակում քաղաքականացված լինել. ՀՊՏՀ ռեկտորի պաշտոնակատար

Երեւանի ավագանու «Իմ քայլը» խմբակցության անդամ լինելը չի նշանակում քաղաքականացված լինել։ Այս մասին ասաց Հայաստանի պետական տնտեսագիտական համալսարանի ռեկտորի պաշտոնակատար Ռուբեն Հայրապետյանը։

«Տնտեսագիտական համալսարանը քաղաքական առումով բացարձակ չեզոք
ղեկավարություն ունի։ Ես հատկապես իմ անունից կարող եմ ասել, որ չեմ եղել
որեւէ կուսակցության անդամ կամ գաղափարներով չեմ հարել որեւէ
կուսակցության, եւ, բնականաբար, այդպես էլ շարունակվելու է։ Եթե որեւէ
ժամանակ որեւէ կուսակցության աջակցած լինեի, բնականաբար այս պաշտոնին ինքս
էլ չէի համաձայնի»,–ասաց նա։

Դիտարկմանը, որ ինքը Երեւանի ավագանու «Իմ քայլը» խմբակցության անդամ է,
ռեկտորի պաշտոնակատարը պնդեց, որ որեւէ քաղաքական թիմում չի եղել. «Ես «Իմ
քայլը» դաշինքի համամասնական ցուցակով ներկայացվել եմ որպես անկուսակցական
ավագանու անդամ, բնականաբար, սա քաղաքական որեւէ ենթատեքստ չի
պարունակում, հատկապես այն դեպքում, երբ ես քաղաքի կառավարման մասնագետ
եմ»։

Նա չի ժխտում, որ «Իմ քայլը» դաշինքի մյուս անդամների հետ ընդհանուր
դիրքորոշում ունի. «Ես որպես «Իմ քայլը» դաշինքի անդամ կիսում եւ
ներկայացնում եմ դաշինքի տեսակետները, սակայն դա չի նշանակում, որ մենք
բուհի քաղաքականացման մասին ենք խոսում։ Դաշինքի իմաստն էլ հենց դա է, որ
քաղաքականացված մարդիկ համագործակցեն ապաքաղաքականացված մարդկանց հետ»։

Նկատառմանը, որ որպես ավագանու «Իմ քայլը» խմբակցության անդամ ընկալվում
է որպես այդ քաղաքական ուժի համակիր, գաղափարակից, Ռուբեն Հայրապետյանն
արձագանքեց. «Ես, անկեղծ ասած, չգիտեմ՝ ում ընկալման մասին եք խոսում,
սակայն կարող եք հարցում անցկացնել մեր ուսանողների շրջանում (ունենք 5800
ուսանող), եթե նրանցից 10 տոկոսը ասի, որ ես քաղաքական հայացքներ ունեմ,
ապա այդ ընկալումը ես ճիշտ կհամարեմ»։

Նա վստահ է՝ հանրապետությունում շատ դժվարությամբ կգտնվի այնպիսի մեկը,
որ այնքան ապաքաղաքականացված լինի, որքան ինքը. «Ես որեւէ կուսակցության
հետ ոչ մի առնչություն չունեմ»,–ասաց Ռուբեն Հայրապետյանը։

Հարցին՝ տնտեսագիտական համալսարանում այս պահին կա՞ն աշխատակիցներ,
որոնք ՀՀԿ–ի անդամ են, նա նշեց. «Բուհում այս պահին կառուցվածքային
փոփոխություններ են տեղի ունենում, հաստատվել է կազմակերպական նոր
կառուցվածք, նոր կառուցվածքին համապատասխան կատարվում են նշանակումներ,
սակայն այդ նշանակումներում գնահատվում են մարդկանց բացառապես մասնագիտական
կարողությունները,  բուհի որեւէ օղակի ղեկավարին արգելված չէ կուսակցական
լիներ, սակայն մեր համալսարանը առավելապես ապաքաղաքականացված է»։

Ռեկտորի պաշտոնակատարը շեշտում է՝ եթե զգա ՀՊՏՀ–ում քաղաքականացման
նույնիսկ չնչին տարրեր կան, հրաժարական կտա։ «Չկա որեւէ ՔՊ–ական պաշտոնյա,
նախարար կամ փոխնախարար, որ կարողանա չնչին ազդեցություն ունենա ՀՊՏՀ–ում
տեղի ունեցող գործընթացների վրա, որովհետեւ եթե նման բան նկատվի, ես
հրաժարական կտամ»,–եզրափակեց նա։

Հիշեցնենք, որ ավելի վաղ ՀՀ վարչապետ Նիկոլ Փաշինյանը հայտարարել էր, որ բուհերը պետք է ապաքաղաքականացվեն։