«Մենք գտնվում ենք գռեհիկ, գիշատիչ կապիտալիզմի փուլում» . Ահարոն Ադիբեկյանը՝ գործազրկության մասին

Գործազրկությունը հնարավոր չի լինի հաղթահարել, եթե պետությունը տնտեսության մեջ ակտիվ դեր չստանձնի։ Այս մասին այսօր՝ մարտի 18-ին լրագրողների հետ հանդիպմանն ասաց «Սոցիոմետր» անկախ սոցիոլոգիական կենտրոնի տնօրեն Ահարոն Ադիբեկյանը։

«Ճգնաժամում գտնվող երկրները ելքեր են փնտրում նման ճգնաժամից դուրս գալու եւ դրա հետեւանքերը հաղթահարելու համար, մեծանում է պետության դերը։ Մեզ մոտ չգիտես ինչու մտածում են, որ եթե հայերին տան տնտեսական ազատություն, նա բավականին խելամիտ է, մի քիչ խորամանկ է, բոլոր հարցերը կլուծի, պարզվում է՝ ոչ։ Մենք գտնվում ենք բավականին լուրջ միջազգային տնտեսական համակարգում եւ մեր գործարարը չունի այնքան միջոց, որ ստեղծի այնքան աշխատատեղ, որ կարողանա ստեղծել աշխատատեղեր, որ զբաղվածությունն ապահովի, պետությունն էլ չի միջամտում»,–նշեց նա։

Սոցիոլոգի խոսքով՝ պետության դերակատարությունը պետք է լինի այնքան ակտիվ, որ հնարավոր լինի խնդիրը լուծել ազգային մակարդակով. «Դժբախտաբար, նոր իշխանության խորհրդատուների շրջանում չկա խելամիտ տնտեսագետ, որ կարողանա նման խորհուրդներ տալ»։

Նա շեշտում է՝ կառավարությունը շարունակում է իրեն պահել որպես նախապայմաններ ստեղծող կողմ, «հնարավորություն տալով մասնավորին, որ իր գործը դնի, դրանով խթանի զբաղվածությունը, այսինքն՝ նա իր ուսերից հանում է այդ կարեւոր խնդիրը»։

«Զբաղվածությունը կապված է հարկային դաշտի հետ, պետության միջամտության հետ, տարբեր հիմնադրամներից գրանտների տեսքով բաշխել նրանց միջեւ, մեզ մոտ չկան գործակալություններ, որ օգնեն մեր գործարարներին դուրս գալ միջազգային շուկա։ Մենք մնում ենք գռեհիկ, գիշատիչ կապիտալիզմի փուլում»,–նշեց Ադիբեկյանը։

Նրա համոզմամբ՝ ոչինչ չի ստացվի, եթե պետությունը ակտիվ դեր չստանձնի։ «Չի կարող անհատ ձեռներեցների զարգացման արդյունքում պետության տնտեսությունը զարգանալ։ Պետք է ոչ թե նախարարությունները կրճատել, այլ նախարարություններին տալ ֆունկցիոնալ ուղղվածություն։ Ունենք Տնտեսական զարգացման եւ ներդրումների նախարարություն, որն անհայտ է, թե ինչով է զբաղվում»,–եզրափակեց սոցիոլոգը։