Եթե քաղաքացին ասի՝ պետք չի ՀԴՄ կտրոն, ապա ոչ մի բան էլ չի փոխվելու, մենք մեր խեղճության մեջ տապակվելու ենք.Փաշինյան

Մի քանի առանցքային բարեփոխումներ կան, որ պատրաստվում ենք իրականացնել, և այդ բոլոր բարեփոխումների իմաստ լինելու է քաջալերել մարդկանց աշխատանքը: Այս մասին ԱԺ ամբիոնից հայտարարեց վարչապետ Նիկոլ Փաշինյանը Կառավարության ծրագիրը ներկայացնելիս:

Նրա խոսքով՝ կառավարության ամենակարևոր նպատակներից մեկը աղքատության հաղթահարումն է: «Աղքատության հաղթահարման գործում կարևոր ենք համարում Հարկային օրենսգրքի փոփոխության մեր ունեցած պատկերացումների մի հատվածը, որով պլանավորվում է Հայաստանի տնտեսական համակարգում նոր հասկացություն ներմուծել, որը պայմանականորեն պետք է անվանել միկրոբիզնես:

Այն պետք է ազատված լինի բոլոր հարկերից, խոսքը մինչև 24 մլն տարեկան շրջանառություն ունեցող բիզնեսների մասին է: Հույս ունեմ՝ առաջիկայում կընդունենք այդ օրենքը, որը հնարավորություն կտա իսկապես քաջալերել մարդկանց փոքր բիզնեսը»,- շեշտեց նա:

Փաշինյանը նշեց, որ սա շատ կարևոր է աղքատության հաղթահարման տեսակետից: «Աղքատություն հաղթահարել ասելով շատ դեպքերում հասկացվում է մարդկանց սնունդ, հագուստ և այլ նյութական միջոցներ մատակարարելը՝ առանց պատասխանելու հետևյալ հարցին, եթե դա հնարավոր է անել, մեկ օր, մեկ շաբաթ դրանից հետո ի՞նչ է տեղի ունենալու: Այս մտածողությունը հատուկ է ներդրված, որ ծառայի կոռուպցիոն համակարգին, ոչ թե մարդկանց աջակցել աղքատությունը հաղթահարելու գործում, այլ աղքատության մեջ ավելի թաղվելու գործում, որ ընտրությունից ընտրություն հնարավոր լինի ընտրակաշառքի միջոցով հարյուր հազարավոր ձայներ հավաքել»,- ասաց նա: Փաշինյանն ընդգծեց, որ աղքատության հաղթահարման լավագույն միջոցն առաջին հերթին աշխատանքն է:

«Չկա և չի կարող լինել աղքատության հաղթահարման որևէ այլ մեթոդ, քան աշխատանքն է: ՀՀ քաղաքացիներին պետք է օգնենք, որ նրանք կարողանան իրենք իրենց համար ստեղծել աշխատատեղեր և հաղթահարել աղքատությունը: Մենք ասում ենք, որ Հայաստանում պետք է հնարավոր լինի 0–ից բիզնես ստեղծել: Սրա համար պետք է հարկային արտոնյալ պայմաններ ստեղծել, մեծացնել ֆինանսական հոսքերի հասանելիությունը»,- նկատեց նա:

Նիկոլ Փաշինյանն ընդգծեց, որ իրենք գտել են լուծումը՝ ինչպես է որոշվելու՝ մարդը 20 մլն շրջանառություն ունի, թե ավելի շատ: «Դա որոշվելու է հաշվիչ դրամարկղային կտրոնների մեքենաների արդյունքում: Այստեղ մենք ունենք մեկ հարց՝ այս առաջարկի արդյունքում մեզ մոտ 0-ից ստեղծվելու են միկրոբիզնեսնե՞ր, թե՞ 100 միլիոնանոց բիզնեսները դառնալու են 5-6 հատ միկրոբիզնեսներ: Այսօր այս խնդիրն ունենք ՀՀ-ում: Երբ շրջանառության հարկը դրվեց, մեզ թվաց, թե մենք բալասան ենք գտել, բայց բերեցին, ամեն մեկը խանութներում 65 հատ հաշվիչ դրամարկղային մեքենաներ շարեցին 65 տարբեր անհատ ձեռներեցների անունով և հարկերից սկսեցին խուսափել»,- հայտարարեց նա:

Վերջինիս խոսքով՝ շատ կարևոր է, թե մարդիկ ինչպես են արձագանքելու յուրաքանչյուր հնարավորությանը: «Կարևոր է՝ հիմա շարունակվելո՞ւ են ՀԴՄ մախինացիաները, թե՞ ոչ: Ուզո՞ւմ եք կանխատեսել՝ ինչ է լինելու տնտեսական հռչակված հեղափոխության արդյունքում: Յուրաքանչյուր քաղաքացի թող ասի՝ ՀԴՄ կտրոն խփել-չխփելու հետ կապված իր դիրքորոշումն ինչպիսին է լինելու, և ես կասեմ՝ ինչ է լինելու տնտեսական հեղափոխության արդյունքում: Եթե քաղաքացին ասի՝ պետք չի ՀԴՄ, ապա ոչ մի բան էլ չի փոխվելու, մենք մեր խեղճության մեջ տապակվելու ենք ու ասենք՝ կառավարությո՛ւն, բա ինչի՞ այս հարցը չլուծեցիր»,- նշեց նա: