«Ստելը վիրավորական չէ, ստելը ձեր գործոլաոճն է», «Ձեր քաղաքական մահվանը երկու օր է մնացել». թեժ բանավեժ Վիգեն Սարգսյանի և Փաշինյանի միջև

Այսօր՝ դեկտեմբերի 5–ին, Հանրային հեռուստաընկերության ուղիղ եթերում ընթացող նախընտրական մեծ բանավեճի ժամանակ «Մենք» դաշինքի ցուցակը գլխավորող Արամ Սարգսյանի հարցը թեժ վեճի առիթ դարձավ Նիկոլ Փաշինյանի և Վիգեն Սարգսյանի միջև։

Սարգսյանը հարցրեց Փաշինյանին՝ «Կարո՞ղ է վատ ու մերժված իշխանությունը դառնալ լավ ընդդիմություն, և լավ ընդդիմադիրը դառնալ վատ իշխանություն»։ Փաշինյանը ճշտեց՝ ոչ թե վատ իշխանություն, այլ ժողովրդին կեղեքած իշխանություն, որը այդ ինստիտուտը զրկել է հեղինակությունից․ «Չեմ կարծում, թե պետք է թույլ տալ, որ ընդդիմության ինստիտուտն էլ զրկվի հեղինակությունից»,- ասաց նա։

Այս ակնարկին արձագանքեց Վիգեն Սարգսյանը․ «Ամենածիծաղելին այն է, որ դուք որոշել եք, թե լավ ընդդիմություն եք եղել։ Քանի որ քարոզարշավը կարճ էր՝ 12 օր, մենք ընտրողներին կարողացանք ներկայացնել միայն 12 հոլովակ Ձեր ստերի մասին․ լինելով ընդդիմություն՝ դուք խաբել եք ժողովրդին՝ սկսած արագաչափերից, կարմիր գծերից, ԵԱՏՄ դիրքորոշումից, ՀԱՊԿ-ից, գազի գնից»։

Փաշինյանը դիտողություն արեց՝ «Հաղորդման կանոնների մեջ նշված է, որ չի կարելի վիրավորական հայտարարություն անել․ դուք ասում եք՝ ստել եք»։ Սրան հաջորդեցին փոխադարձ մեղադրանքներ․

«Ստելը վիրավորական չէ, ստելը ձեր գործոլաոճն է»,- ասաց Վիգեն Սարգսյանը, ինչին Փաշինյանը պատասխանեց նոuյն ոճով․ «Ձեր կառավարությունը, իշխանությունը եղել են ստահոդ»։

Վիգեն Սարգսյանը հիշեց քրեական գործերով վախեցնելու գործելաոճը, ասաց՝ «դրանցով մի վախեցրեք, առանց այդ էլ խայտառակ բան եք արել․ ԱԱԾ-ն վերածել եք НКВД-ի, ընտրություններին մասնակցող թեկնածուին ընտրություններից առաջ կանչում եք НКВД՝ խայտառակ անելով ԱԱԾ-ի մեր սպաների պատիվը»։

Փաշինյանը բացատրեց՝ «Դուք իշխանությանը մեղադրել եք պետական դավաճանության համար և պետք է փաստեր ներկայացնեք»։

ՀՀԿ-ական թեկնածուն վերադառնալով ընդդիմադիր Փաշինյանի թեմային՝ նշեց․ «Ամեն օր դուք՝ որպես վարչապետ, հերքում եք ընդդիմադիր Փաշինյանին․ ի դեպ, ինձ ասացին՝ ձեր գրքում, որ դեռ չեմ հասցրել կարդալ, գրած է՝ ընդդիմադրի մահը իշխանությունն է, կարծես թե՝ մոտենում եք դրան»։

Փաշինյանը խորհուրդ տվեց «քաղաքական մահ» բառակապակցությունը զգույշ օգտագործել․ «որովհետև ձեր քաղաքական մահվանը երկու օր է մնացել, վայելեք ձեր վերջին երկու օրերը, որովհետև առաջիկա 5-10 տարիներին ձեզ էլ հարցազրույցի չեն կանչելու՝ անհետաքրքիր լինելու պատճառով»։