Ֆրանսիացի փորձագետները կօժանդակեն ՀՀ-ում աշխարհագրական նշումով գինիների համակարգ ստեղծել

Գյուղատնտեսության նախարարի պաշտոնակատար Գեղամ Գեւորգյանն այսօր հյուրընկալել է ֆրանսիացի փորձագետներին, որոնք Հայաստան են ժամանել Հայաստանի խաղողագործության եւ գինեգործության հիմնադրամի հրավերով՝ աշխարհագրական նշումով գինիների համակարգի ստեղծման եւ կիրարկման հարցում հայ մասնագետներին օժանդակելու նպատակով։ Փորձագիտական խմբին ուղեկցում էր Հայաստանում Ֆրանսիայի արտակարգ եւ լիազոր դեսպան Ժոնաթան Լաքոտը։

Գյուղնախարարությունից հայտնում են, որ «Խաղողագործությունը եւ գինեգործությունը մեր առաջնահերթություններից են, այժմ մենք խաղողագործության զարգացման ռազմավարություն ենք մշակում, որում կարտացոլվեն բոլոր հիմնական հարցերը՝ խաղողի այգիների հիմնումից մինչեւ վերամշակված արտադրանքի վաճառք։ Աշխարհագրական նշումներով գինեգործության զարգացման հարցում ֆրանսիական փորձը մեզ համար անգնահատելի ներդրում է, եւ ես հուսով եմ, որ Հայաստանի խաղողագործության եւ գինեգործության հիմնադրամի հետ համատեղ այս տարվա ընթացքում լուրջ հաջողություններ կարող եք ունենալ»,-ողջունելով հյուրերին՝ մասնավորապես նշել է Գեղամ Գեւորգյանը։

Դեսպան Ժոնաթան Լաքոտը, շնորհակալություն հայտնելով ընդունելության համար, իր խոսքում շեշտել է, որ գյուղատնտեսությունը հայ-ֆրանսիական համագործակցության հարցում կենտրոնական դերակատարություն ունի՝ օժանդակության պատրաստակամություն հայտնելով։ Այս համատեքստում նա արժանահիշատակ է համարել աշխարհագրական նշումով գինիների համակարգի ստեղծմանը նվիրված աշխատաժողովի անցկացումը։

Հայաստանում Ֆրանսիայի դեսպանատան գյուղատնտեսության գծով խորհրդական Ալեքսանդր Մարտինեզն իր հերթին շնորհակալություն է հայտնել Հայաստանի խաղողագործության եւ գինեգործության հիմնադրամին՝ բարձր պրոֆեսիոնալիզմի եւ հագեցած ու բովանդակալից ծրագրի համար, որի շնորհիվ նրանք կարողացան բացահայտել Հայաստանի գինեգործության առկա ներուժը։ Նա հավելել է, որ աշխատաժողովի անցկացումից զատ գալիք տարեսկզբից ֆրանսիացի փորձագետները պատրաստակամ են տրամադրել տեխնիկական օժանդակություն աշխարհագրական նշումով գինիների համակարգի ներդրմանը վերաբերող հարցերում։

Զրուցակիցներն անդրադարձ են կատարել նաեւ ոլորտի իրավական դաշտի կանոնակարգմանը եւ երկուստեք հետաքրքրություններ ներկայացնող մի շարք այլ հարցերի։