Եթե տրանսֆերները հարկեն, մարդիկ պայուսակներով կբերեն փողը կամ էլ կարտագաղթեն. տնտեսագետ

Գոնե այս պահին պետք է ձեռնպահ մնալ նման լուծումներից. այս մասին Tert.am-ի հետ զրույցում ասաց տնտեսագետ Ատոմ Մարգարյանը՝ խոսելով ՊԵԿ–ին վերագրվող մի գաղափարի, ըստ որի՝ 2020 թ.-ից եկամտային հարկի պոտենցիալ վճարող են դառնալու Հայաստանի 18-65 տարեկան բոլոր քաղաքացիները: Առաջին քայլը, նախագծի համաձայն, պետք է լինի քաղաքացու կողմից սեփական եկամուտները պարտադիր հայտարարագրելը, ըստ որի կորոշվի՝ նա ունի՞ հարկման ենթակա եկամուտ, թե՞ ոչ:

Ըստ Մարգարյանի՝ այս ոչ պոպուլյար նախագիծը «լավ օրից չի բերվել»: Նա ասաց, որ նախագծի թղթային տարբերակը կարծես շրջանառության մեջ չի, ինչից կարելի է ենթադրել, որ որ փորձ է արվում ստուգել հանրային տրամադրությունները:

«Միշտ էլ ասվել է, որ երկրի բոլոր չափահաս քաղաքացիների եկամուտների հայտարարագրման համընդհանուր համակարգ պետք է ներդրվի: Նախագիծը, այո, վերաբերում է նաև դրսից Հայաստան ուղարկվող գումարի հարկմանը: Չեմ կարծում, թե դա լավագույն լուծումն է: Պետք է լավ կշռադատել որոշելուց առաջ: Այն երկրները, որոնց հետ Հայաստանն ունի կրկնակի հարկումից խուսափելու պայմանագիր, նման մոտեցումն անտեղի կլինի: Հարկել Ռուսաստանում ապրող մեր հայրենակիցները, որոնք մի կերպ ենք ծայրը ծայրին հասցնում, ամսական 100-200 դոլար են ուղարկում իրենց ընտանիքներին, ոչ մեկի կողմից չի հասկացվի»,- նշեց Ատոմ Մարգարյանը:

Տնտեսագետը շեշտեց, որ այս նախագծի ընդունման արդյունքում մարդիկ կտանեն իրենց ընտանիքներին Հայաստանից: «Եթե դրակոնյան մոտեցումներ որդեգրվեն, մարդիկ իրենց ընտանիքներին կտանեն իրենց մոտ՝ արտերկիր»,- հավելեց նա:

Ա. Մարգարյանն ասաց, որ բոլոր չափահաս քաղաքացիների համար հայտարարագրման ընդհանուր համակարգ ներդնելը շատ կարևոր է: Տնտեսագետը նշեց, որ նման համակարգի ներդրումը երկարատև աշխատանք է:

Տնտեսագետը հիշեցրեց, որ նախորդ կառավարություններն էլ փորձել են նման նախագծեր ընդունել, բայց «բախվել են հակադրության»: «Տեխնոլոգիապես նման համակարգ ներդնելը բարդ է: Բանկային փոխանցումները կշրջանցեն մարդիկ, կծաղկի գրպանով փոխանցումների համակարգը: Մարդիկ պայուսակներով կբերեն, նեգատիվն ավելի մեծ կլինի: Կամ էլ տրանսֆերները Հայաստան չեն ուղարկի, ընտանիքներին կտանեն: Սա կխթանի արտագաղթը»,- նշեց նա:

Մանրամասն՝ սկզբնաղբյուր կայքում