Խորհրդարանը զենք ճոճելու, ծափերի տեղ չէ. Ալիկ Սարգսյան

Իմ կարծիքով՝ ՀՀԿ-ն շանսեր ունի խորհրդարան անցնելու. քանի տոկոս ձայն կհավաքի՝ էական չէ, բայց որ կանցնի, գրեթե չեմ կասկածում: Այս մասին Tert.am-ի հետ զրույցում ասաց ԱԺ «ՀՀԿ» խմբակցության պատգամավոր, նախկին ոստիկանապետ Ալիկ Սարգսյանը:

Ինչ վերաբերում է հարցին, թե եթե չի կասկածում , որ ՀՀԿ-ն կանցնի, ապա ինչու որոշեց չմասնակցել ընտրություններին, Ալիկ Սարգսյանն ասաց.

«Այս պահին նպատակահարմար չեմ գտնում գտնվել ընդդիմադիր դաշտում, խորհրդարանում աշխատանքս շարունակել նույնպես նպատակահարմար չեմ գտնում, մի տեսակ հիասթափություն կա ամեն ինչի նկատմամբ: Հիմա կուզեմ զերծ մնալ էս ամեն ինչից: Մի խոսքով՝ ինձ հարմար չի: Էս պահին ես էլի ՀՀԿ անդամ եմ, մարզային խորհրդի նախագահն եմ, էլի կօգնեմ, թեկնածուներ կան, որոշակի քանակի ձայներ կապահովենք: Կօգնեմ էն առումով, որ կաշխատեմ ճիշտ կազմակերպել էդ քարոզարշավը, մարդիկ կարողանան պահը գնահատել և իրենց ձայները տան ՀՀԿ-ին»,- նշեց նա:

Անդրադառնալով հարցին՝ եթե Արայիկ Գրիգորյանը, ում հետ ինքը լարված հարաբերություններ ունի, ՀՀԿ ցուցակում չկա, նախկինում մարզից ամենաշատ ձայներ ինքն է ապահովել, ապա ինչպես են քվե բերելու, Ալիկ Սարգսյանն ասաց.

«Չգիտեմ՝ Գրիգորյանները ցուցակում կան, չկան, նույնիսկ չեմ հետաքրքրվում: Ես զբաղվելու եմ միայն Արտաշատի տարծաշրջանով, Արարատով չեմ զբաղվելու, Մասիսով չեմ զբաղվելու, մնացածը մարդիկ կան, զբաղվում են, աշխատում են, կարծես թե աշխատանքի բաժանում արդեն տեղի է ունեցել»,- նկատեց նա:

Անդրադառնալով դիտարկմանը՝ ինչպես է վերաբերվում նրան, որ ՀՀԿ քվոտայով նախկինում խորհրդարանում հայտնվածները դժվարին պահին լքել են կուսակցությունը, Ալիկ Սարգսյանն ասաց.

«Իրադարձություններն այնպես զարգացան, որ ամեն մի գործողություն իր բացատրությունն ունի, որի մասին եթե լսեն, ապա կուլիսների հետևում , առերես որևիցե մեկը ճիշտ չի ուզում բացատրել,թե ինչ է կատարվել և ինչ է կատարվում իրականում, բայց յուրաքանչյուրն ունի իր բացատրությունը, որը շատ-շատ ավելի հարգելի է, քան աններելի պիտակավորելը»,-մանրամասնեց նա:

Անդրադառնալով դիտարկմանը, թե գուցե ինքն էլ անկեղծ չէ և չի ուզում ընդդիմություն լինել ոչ թե իր կողմից նշված պատճառով, այլ գուցե ճնշումներ կան իրեն առնչվող երկու քրեական գործի շրջանակում, նախկին ոստիկանապետն ասաց.

«Ոչ, կապ չունի: Ինչի՞ եք տենց անհավատ, ես հենց սկզբից ասել եմ՝ այդտեղ քրեական գործեր չկան, աբսուրդի աստիճան քրեական գործեր են, որոնց կյանքը շատ կարճ է, և առաջիկա խաչմերուկում էս գործերը կավարտվեն և կվախճանվեն: Գործից առայժմ ոչ մի ընթացք չկա. սենց քնած, սառած... սպասում եմ, տեսնեմ՝ վերջը ինչ կլինի, մի քիչ էլ կսպասեմ, եթե չէ, իմ բողոքների արդյունքում կաշխատեմ գործն արագացնել, մի շաբաթվա ընթացքում ավարտեմ»,- շեշտեց նա:

Անդրադառնալով ապագա խորհրդարանի և իշխանության ձևավորմանը՝ Ալիկ Սարգսյանն ասաց, որ չի կարծում, թե միանձնյա իշխանության ձևավորման վտանգ կարող է լինել, պատգամավորը չի կասկածում, որ ՔՊ-ը կլինի մեծամասնություն, բայց վստահ է, որ խորհրդարանում այլ ուժեր էլ ներկայացված կլինեն , այդ թվում՝ կձևավորվի խորհրդարանական ընդդիմություն:

Ինչ վերաբերում է մտահոգություններին, թե վտանգավոր է, որ խորհրդարանում ցանկանում են հայտնվել «Սասնա Ծռերը», ովքեր զենքով պայքարի կողմնակից են եղել, Ալիկ Սարգսյանն ասաց.

«Որ էդպես նայենք, շատ բաներում եմ վտանգ տեսնում, ոչ միայն էդ մարդկանց հետ կապված, նոր ուժերի հետ էլ, հների հետ էլ շատ վտանգներ եմ տեսնում: Դրա համար եմ ասում՝ նոր խորհրդարանի մասին կխոսենք մի քիչ ավելի ուշ: Պարզապես ուզում եմ հավատալ, որ ժողովուրդն այնքան ինքնագիտակցություն, հմտություն, կամք կունենա, որ գոնե հիմա ճիշտ ընտրություն կկատարի մարդկանց միջև: Ես չեմ հորդորում որևիցե կուսակցության ընտրել կամ չընտրել, այլ նկատի ունեմ ավելի շատ այն, որ գոնե ցուցակը լրացնելիս այնպիսի մարդկանց ներառեին, ովքեր խորհրդարանում խոսք կունենան ասելու: Խորհրդարանը դերասանության, ծափեր տալու տեղ չի, շատ ավելի լուրջ հիմնարկ է, քան ոմանք պատկերացնում են: Գան, խորհրդարանում ինչ-որ ամպագոռգոռ խոսքեր ասեն, զենքի կիրառման ակնարկներ անեն, սա ցանկացած նորմալ երկրում մտավոր հետամնացության աստիճան է դիտարկվում: Խորհրդարանը զենք ճոճելու տեղ չէ, խոսքի, մտքի տեղ է, որը պետք է հետագայում վերածվի գործողությունների , նպաստ բերի մեր ժողովրդին, այլապես կլինի ծաղրուծանակ, ոչ թե խորհրդարան»,- նշեց նա: