Եթե ռեյտինգայինում Նիկոլի սելֆիի ձողիկը դնի, էլի առաջին տեղն եք գրավելու. Արմեն Աշոտյան (տեսանյութ)

«Ես հասկանում եմ, որ Հայաստանի նորագույն պատմության մեջ դժվար է մարսել առաջին նախադեպը, երբ նախորդ իշխանությունները ոչ թե ջախջախվում, տրորվում, անհետանում են, ինչպես կոմունիստներն էին կամ ՀՀՇ-ն իր հին կազմով, այլ փորձում են ինստիտուցիոնալ քաղաքական հիշողություն պահել դաշտում՝ ստեղծելով քաղաքական համակարգի կայացման ավանդույթներ: Սա այն դեպքն է, երբ ՀՀԿ-ի մասնակցությունը նպաստելու է ժողովրդավարության զարգացմանը Հայաստանում և պետականաշինության զարգացմանը:

Ե՛վ մեր գիտելիքները, և՛ մեր փորձը, և՛ մեր սխալները կարող են շատ թանկ լինել նաև այս իշխանությունների համար: Հուսով եմ՝ կլինեն մարդիկ, ովքեր կցանկանան խորհրդարանում տեսնել այնպիսի քաղաքական գործիչների, որոնք ունեն գործադիր իշխանության, երկիրը ներկայացնելու փորձ և անհամեստորեն թող չթվա՝ նաև հնարավորություններ, մտավոր կարողություններ՝ աշխատելու նաև այս իշխանությունների հետ»,- նշեց նա:

Արմեն Աշոտյանը նշեց, որ դիտել է ՀՀ փոխվարչապետների հարցազրույցները.

«Մեկը մյուսից ընտիր, ասում է՝ մենք մրցակիցներ չունենք, մյուսն ասում է, որ ՀՀԿ-ն իրենց մրցակից չէ, մյուսն ասում է, որ իրենք արդեն հաղթել են: Տղե՛րք, նորից ասեմ, մի՛ կրկնեք իմ ու պարոն Էդիկի սխալները, մի՛ արեք դա, որովհետև կործանումը սկսում է մեծամտությունից, կործանումը սկսվում է գոռոզամտությունից, մի՛ արեք դա:

Փարք աստծո, որ մի նախարար գտնվեց՝ ԿԳՆ նախարարն էր, որ ասաց՝ բոլորն են իրենց մրցակից: Եթե գլուխ եք գովում Նիկոլի ստվերի տակ, հիշե՛ք, եթե ձեր նախընտրական եռյակի առաջին տեղում լինի Նիկոլի ուսապարկը, երկրորդ տեղում Նիկոլի «դուխով» գլխարկը, երրորդ տեղում՝ Նիկոլի հազը, դուք, մեկ է, 80 տոկոս ձայն եք հավաքելու, իսկ եթե ռեյտինգայինով այնտեղ, որտեղ ես եմ դնում, լինի ոչ թե ֆիզիկական անձ, այլ Նիկոլի սելֆիի ձողիկը, էլի առաջին տեղն եք գրավելու»: