Արաբկիրի արդեն նախկին ղեկավար Հովհաննես Վարդանյանը թերևս միակ թաղապետն էր, ով մինչև վերջ պահեց իր խոստումը (լուսանկարներ)

Անցած տարի գարնանը դիմեցի Արաբկիրի արդեն նախկին թաղապետ Հովհաննես Վարդանյանին՝ մեր բակի եզրաքարերը փոխելու համար: Թաղապետն ավելի լավ տարբերակ առաջարկեց՝ վերանորոգել ողջ բակը: Բնականաբար դեմ չեղա, որովհետև վերջին անգամ չէի հիշում, թե երբ էր շինտեխնիկա մտել բակ, էլ ուր մնաց վերանորոգվեր: Օրինակ կողքի բակը, որը երևի 3 անգամ մեծ է մերինից, նախկինում պարբերաբար վերանորոգվում էր: Ասում էին ՀՀԿ-ից չգիտեմ ով էր բնակվում այդտեղ: Դե իսկ մերը կսպասեր:

Մի խոսքով՝ թաղապետի հետ պայմանավորվեցին բնակիչներից ստորագրություններ հավաքել, որ նրանք դեմ չեն, որ բակը բարեկարգվի: Անհրաժեշտ քանակության ստորագրություն հավաքվեց, բայց պարզվեց կան բնակիչներ, ովքեր այդքան էլ կողմ չեն գեղեցիկ ու մարդավայել բակ ունենալուն: Պատճառը մեկն էր՝ տարիներ առաջ, տարբեր թաղապետերի օրոք, իրենց հայտնի ճանապարհով զավթել էին բակի տարածքը, ցանկապատել ու իրենց մեքենաների համար որպես կայանատեղի էին օգտագործում: Իսկ բարեկարգելն իր մեջ ներառում էր նաև այդպիսի ապօրինի կառույցների վերացում: Դե արդեն պատկերացրեք, թե ինչ թատրոն էր ամեն անգամ մեր բակում, երբ շինարարները գալիս էին գործ անելու: 

Զրուցեցի թաղապետի հետ խնդրի վերաբերյալ, ասեց՝ քանդվելու են: Անկեղծ ասած սկզբում թերահավատ էի, որովհետև ոնց ապօրինի կառուցել էին, տենց էլ միջոցներ կգտնեի այդ արգելքը ևս շրջանցելու: Բայց, ի ուրախություն ինձ ու շատ հարևանների, թաղապետն իր խոսքի տերն եղավ, ու չնայած ոչնչի՝ այդ ցանցապատ տարածքները քանդվեցին, վերադարձվեցին բակին: Այսօր դրանց փոխարեն մանկական խաղահրապարակ, նստարաններ ու սալիկապատ ճեմուղի է:
Ստորև կտեղադրեմ ներկա ու նախկին նկարները, ինքներդ կհամոզվեք դրանում:
Իհարկե որոշները փորձեցին առիթը բաց չթողնել ու իրենց վերագրել բակի բարեկարգումը, որովհետև ես սեր չունեմ արածներիս մասին բարձրաձայնելու, բայց եկեք չխոսեմ նման էժան մարդկանց մասին:

Ասածս ինչ է՝ այսօր արդեն Հովհաննես Վարդանյանը թաղապետ չէ, բայց իր արածը, կոնկրետ մեր բակի մասով, շատ վարչական շրջանների ղեկավարների համար օրինակ պետք է ծառայի: Համենային դեպս ես Արաբկիրի նման թաղապետի չեմ հիշում:
Պարոն Վարդանյանը խոստացել էր նաև հասնել այն խնդրահարույց ճանապարհի վերանորոգման համար իրավական հիմքերին, որի մասին բազմիցս գրել էի, բայց ափսոս, որ միշտ չէ ամեն ինչ մեր ուզածով լինում: Հուսամ նոր թաղապետը ևս բաց կլինի բնակիչների համար ու վերջապես կհասնեմ այդ ճանապարհի վերանորոգմանը:
Սա թերևս իմ շնորհակալության խոսքն էր պարոն Վարդանյանին՝ առաջին հերթին իր խոսքի տերը լինելու, և հետո միայն վարչական շրջանի լավ ղեկավար լինելու համար: Ճիշտ է, պետական գործիչներին շնորհակալություն չեմ հայտնում իրենց գործն անելու համար, բայց էնքան ենք կարոտ մնացել գոնե խոսքի տերը լինելուն, որ նման դեպքերի մասին պետք է անպայման բարձրաձայնել: