Ես չեմ ուզում, որ Նուբարաշեն ասելով՝ հիշենք աղբանոցը, գժանոցը, Երևանը միայն Կենտրոնը չէ. Հայկ Մարության

Սեպտեմբերի 23-ին բոլորս մեկ մարդու պես գնում և իրացնում ենք ազատ և թափանցիկ ընտրությունների մեր իրավունքը և ընտրում ենք այն ուժին, որին վստահում ենք. Նուբարաշեն համայնքում կազմակերպված հանրահավաքում ասաց Երևանի ավագանու արտահերթ ընտրություններում «Իմ քայլը» դաշինքի քաղաքապետի թեկնածու Հայկ Մարությանը:

«Այս անգամ ոչ ոք չի կարող գողանալ ձեր քվեն, կեղծել ձեր քվեն, միայն երևանցիներն են այսուհետ ընտրելու Երևանի քաղաքային իշխանություններին»,- ասաց նա:

Հայկ Մարությանը նշեց, որ որպես հեղափոխության տրամաբանական շարունակություն՝ ստեղծվել է «Իմ քայլը» դաշինքը: «Ցուցակում ներառված են մարդիկ, որոնք տասնյակ տարիներ ձեր կողքին են եղել, ժողովրդի կողքին, որպեսզի այս օրը գա: Ցուցակում ներառված են իրենց աշխատանքի պրոֆեսիոնալներ, մարդիկ, ովքեր ամեն օր գիշեր–ցերեկ ապրում ու մտահոգված են Երևանի ներկայով ու ապագայով»,- ասաց նա:

Քաղաքապետի թեկնածուն ներկայացրեց դաշինքի նախընտրական ծրագիրը, թե ինչ են անելու, եթե ստանան վստահության քվեն: Մարությանը նշեց, որ այլևս բոլոր կարևոր հարցերը կորոշվեն հանրաքվեի միջոցով: ՔՊ թեկնածուն խոսեց նաև տրանսպորտային խնդիրներից:

«Ինձ համար տրանսպորտի հարցը դարձել է պատվի հարց: Ինձ համար ամոթ է, որ տարեց մարդը և ընդհանրապես մեր քաղաքացիները կռացած են գնում աշխատանքի, որ ամռանը շոգում են, ձմռանը՝ մրսում, և այս խնդրին պետք է լուծում տալ: Մենք պետք է պարտադիր ազատվենք այս «մարշրուտկա» կոչվածներից»,- ասաց նա և նշեց, որ լուծումները ներդրումային ծրագրերն են՝ միասնական ցանցի ստեղծում, արդիականացում:

«Պետք է վերանան բոլոր գծերը՝ իրենց գծատերերով, կլինեն նոր երթուղիներ՝ նոր կանգառներով, նոր մենեջմենթ, ներմուծելու ենք բարձրակարգ ավտոբուսներ»,- ասաց նա: Մարությանը նշեց, որ մետրոյի առնվազն մեկ կայարանի կառուցում կլինի «Թումոյի» մոտ:

Նա նաև Նուբարաշեն համայնքից խոսեց. «Ես չեմ ուզում, որ Նուբարաշեն ասելով՝ հիշենք աղբանոցը, գժանոցը, բոլոր «-ոցերը», որովհետև մեր նշանաբանն է, որ Երևանը միայն Կենտրոնը չէ»,- ասաց նա: