Կենսաթոշակային ներկայիս համակարգի նկատմամբ վստահությունը կառավարության վստահության հետ կապ չունի. ՀՅԴ

ՀՅԴ տնտեսական հետազոտությունների գրասենյակի պատասխանատու, տնտեսագետ Սուրեն Պարսյանը, ՀՅԴ ԳՄ-ի անդամ Արմեն Գրիգորյանը և ՀՅԴ Բյուրոյի տնտեսական հետազոտությունների գրասենյակի ծրագրերի համակարգող Թադևոս Ավետիսյանն այսօր մամուլի ասուլիսին ներկայացրին ՀՅԴ տնտեսական հանձնախմբի հետազոտությունը՝ Կուտակային կենսաթոշակային համակարգի վերաբերյալ:

Արմեն Գրիգորյանը նշեց, որ կենսաթոշակային համակարգը ամբողջությամբ բարելավելու արդյունավետությունը բարձրացնելու հարցը կարևորագույն խնդիրներից մեկն է, իսկ այն համակարգը, որ ներդրվել է Հայաստանում, բազմաթիվ խնդիրներ ունի:

Նա կարևորեց նաև հանրությանը մանրամասների մասին տեղյակ պահելը: «Դաշնակցական որևէ գործիչ երբեք չի արտահայտել կուսակցության աջակցությունն այս համակարգին: Մեր տեսակետը չի փոխվել նաև այսօր: Մեր նպատակն է պարտադիր բաղադրիչի չեղարկումը, պետք է ընդհանրապես չեղարկել այդ օրենքը և ներկայացնել բարելավման նոր կենսաթոշակային համակարգ»,-ասաց նա և հույս հայտնեց, որ կառավարությունն իրենց ներկայացրած առաջարկություններով կառաջնորդվի:

Թադևոս Ավետիսյանը նշեց, որ կենսաթոշակային համակարգը երկարատև զարգացման դինամիկա ունի, դժվար է անել բարեփոխում՝ առանց ուսումնասիրելու այլ երկրների փորձը: «Չկա կենսաթոշակային լուծումների ընդհանուր բանաձև, որ կարելի է վերցնել, տեղայնացնել և հասնել հաջողության, քանի որ դրանք բազմագործոն են»,-ասաց նա և նշեց, որ, ընդհանուր առմամբ հանրությունն առավելապես կողմ է սերունդների համերաշխության սկզբունքին:

Ներկայացնելով այլ երկրների փորձը՝ նա ասաց, որ ճնշմամբ ընդունված ցանկացած կենսաթոշակային բարեփոխում ձախողվել է, երկար կյանք չի ունեցել, անընդհատ վերանայվել է: «Մեր հանրությունը դեմ է այս ձևով կենսաթոշակային համակարգին:

Միջազգային փորձում կարմիր թելով գնում է այն, որ որտեղ ստիպողաբար են ընդունել, որոշ ժամանակ հետո հանգուցալուծվել են՝ վերադառնալով ելման կետեր»,-ասաց նա և նշեց, որ 40 տարի հետո ենք իմանալու՝ այս փաթեթավորված գեղեցիկ խոսքերը իրականություն են դառնալու, թե ոչ:

Նա նշեց, որ փորձել են համապարփակ մասնագիտական վերլուծություններ իրականացնել և դրանք ներկայացրել են հնարավոր բոլոր շրջանակներին՝ կառավարության անդամներին, պատգամավորներին:

Սուրեն Պարսյանն ասաց, որ թեև նախկին կենսաթոշակային համակարգը սոցիալական արդարություն չէր ապահովում, սակայն ներկայիս կենսաթոշակային համակարգը ևս չի լուծում այս անարդարությունը, ավելին՝ավելի մեծ անարդարություն է առաջացնում:

Ինչ վերաբերում է հարկային պարտավորություններից խուսափելու խնդրին նախկին կենսաթոշակային համակարգի պայմաններում, նա նշեց, որ դա հարկային վարչարարության խնդիրն է, որը չի կարող կենսաթոշակային որևէ համակարգը լուծել, և դա իրար հետ չի կարելի կապել: «Այս կենսաթոշակային համակարգի ներդրմամբ չի լուծվում նաև ժողովրդագրական խնդիրները: Այս համակարգը բացասական ազդեցություն կունենա ժողովրդավարական խնդիրների վրա, քանի որ ծննդաբերելիս, հետծննդյան արձակուրդում կուտակում չի արվում»,-ասաց նա:

Ըստ նրա՝ մարդ եթե ունի գումար, ապա խնայողություն անում է, այնպես չէ, որ պետությունը պետք է ստիպի, որ խնայողություններ արվեն: Բացի այդ նա նկատեց, որ դժվար է անել 20-40 տարվա կանխատեսում, ինչը այս համակարգը դարձնում է ռիսկային: «Քաղաքացիների վրա պետության պարտավորություն չի կարելի փոխանցել: Ներկայիս համակարգը լուրջ խնդիրներ ունի, աշխատանքով ապահովելու պարտավորություն չի կրում, որի արդյունքում կլինի կուտակում, իսկ այս համակարգի մեխն այն է, որ անընդհատ մարդ աշխատի, կուտակի և, ըստ այդմ, բարձր թոշակ ունենա»,-ասաց նա և չնայած դրան նկատեց, որ աղքատ երկրում բարեկեցիկ թոշակառու չպետք է լինի:

Նա գտնում է, որ այս համակարգը հակասահմանադրական է, չունի հանրային վստահություն, չունի կառավարման միասնական մարմին: «Այս համակարգի նկատմամբ վստահությունը կառավարության վստահության հետ կապ չունի, քանի որ այն ապագային միտված է»: