ՀՊՏՀ-ում քառօրյա պատերազմում զոհված հերոսների լուսանկարներով լսարան բացվեց (լուսանկարներ և տեսանյութ)
Այսօր՝ սեպտեմբերի 10-ին, ՀՊՏՀ-ում, տեղի ունեցավ ապրիլյան քառօրյա պատերազմում զոհված հերոսների անվան լսարանի բացման հանդիսավոր արարողությունը: Ծրագիրն իրականացվել էր ՀՊՏՀ ուսանողական խորհրդի նախաձեռնությամբ, Հայաստանի երիտասարդական հիմնադրամի հետ համատեղ: Միջոցառմանը ներկա էր ՀՀ պաշտպանության նախարարի պաշտոնակատար Սեյրան Օհանյանը:
Նա բուհի ռեկտոր Կորյուն Աթոյանի հետ միասին իրականացրեց անվանակոչված լսարանի հանդիսավոր բացումը: Նախարարի պաշտոնակատարը ծանոթացավ լսարանին, որտեղ «Բարձունքը մերն է, տղերքը՝ չկան, տղերքն ավելի բարձրում մնացին…» վերտառությամբ ներկայացված էին քառօրյա պատերազմում հայրենիքի համար կյանքը տալով հերոսացած զինվորների լուսանկարները, պատերազմական դրվագները և կադրեր առաջնագծից:
Ծանոթության ավարտին՝ Սեյրան Օհանյանը, ՀՀ պաշտպանության նախարարության կողմից, խորհրդանշական հուշանվեր հանձնեց:
Լսարանի հանդիսավոր բացման արարողությանը հաջորդեց պաշտպանության նախարարի պաշտոնակատարի հանդիպումը բուհի ուսանողների և պրոֆեսորադասախոսական համակազմի անդամների հետ: ՀՊՏՀ ռեկտոր Կորյուն Աթոյանն իր և բուհի անունից երախտագիտություն հայտնեց Սեյրան Օհանյանին բուհ-բանակ կապն ամրապնդելու ուղղությամբ իրականացվող ծրագրերին ցուցաբերվող մշտական աջակցության համար: Ողջունելով ներկաներին՝ ՀՊՏՀ Ուսանողական խորհրդի նախագահ Սերգեյ Խառատյանը տեսահոլովակով ներկայացրեց նախորդ՝ 2015-2016 ուսումնական տարվա ընթացքում ուսանողական խորհրդի նախաձեռնությամբ համալսարանում և համալսարանից դուրս իրականացված բազմաթիվ ռազմահայրենասիրական միջոցառումներն ու ծրագրերը:
Սեյրան Օհանյանը, բարձր գնահատելով երիտասարդների ռազմահայրենասիրական դաստիարակությունը, ասաց. «Մեր բանակի կողքին, ի դեմս ուսանողական խորհրդի, ձևավորվել է մի նոր բանակ, որը մշտապես կանգնած է մեր կողքին և աջակցում է բոլոր հարցերում, և ես իմ երախտագիտությունն եմ հայտնում այս կառույցին: Մեզ համար շատ կարևոր է առաջին գիծ այցելելը, որտեղ մեր զինծառայողները զգում են մեր ժողովրդի տաք շունչը, զգում են մեր երիտասարդների աջակցությունը և դրա շնորհիվ է, որ մեր զինվորն այսօր կանգնած սահմանին իր պատրաստակամությամբ, իր գաղափարական բարձր մակարդակով, ըմբոստ կեցվածքով, նայում է դեպի առաջ և անհրաժեշտության դեպքում հրամանատարների հետ միասին մարտավարական նոր ձևեր, հնարքներ հորինելով կարողանում է պաշտպանել մեր հայրենիքի սահմանները: Այս ամենն անհրաժեշտություն է և առանց այսպիսի միջոցառումների, փորձի փոխանակման, արիության դասերի, իհարկե՛, մենք չենք կարող մեր երիտասարդներին ներկայացնել այն վառ օրինակները, որոնց հիման վրա մենք կարողանում ենք ունենալ հաջողություններ: Ինչպես չներկայացնել օրինակ՝ Արցախի հերոս Ռոբերտ Աբաջյանի հերոսությունը՝ դրսևորումն առաջին գծում: Այդպիսի վառ օրինակներ շատ կան և եղել են նաև Արցախյան ազատամարտի ժամանակ: Եթե չլինի այսօր հայ զինվորը, հայկական բանակին դժվար կլիներ մեր անվտանգության ապահովման խնդիրները բարձր մակարդակով իրականցնելը»:
Միջոցառմանը ներկա էին նաև ՀՊՏՀ-ում սովորող ուսանողներ, ովքեր ծառայության մեջ էին գտնվում: Սեյրան Օհանյանն իր ելույթից հետո, բոլորի ներկայությամբ, հայտարարեց նրանց 10 օրվա արձակուրդի մասին:
Այնուհետև, նախարարը գերատեսչական մեդալներով, պատվոգրերով և հուշանվերներով պարգևատրեց բուհի դասախոսներին և ուսանողներին: Նա նույպես ստացավ նվեր ՀՊՏՀ-ի ուսանողների և պրոֆեսորադասախոսական համակազմի անդամների կողմից:
Հանդիպման ավարտին ուսանողները հնարավորություն ունեցան նախարարին ուղղել իրենց հարցերը, որոնք առնչվում էին բանակային կյանքին, սահմանագծում տիրող իրավիճակին և այլ հարակից ոլորտներին:
Ավարտելով միջոցառումը, հանդիպումը, ուսանողների հետ հարց ու պատասխանը, ՀՀ պաշտպանության նախարարի պաշտոնակատար Սեյրան Օհանյանը, պատասխանեց նաև լրագրողների մի շարք հարցերին:
Մանրամասները կարող եք դիտել ստորև բերված տեսանյութում և լուսանկարներում: