Երգչուհի Ալլա Նավասարդյանը ընկերների հետ տոնում է իր ծննդյան տարեդարձը (լուսանկարներ)
- Ձեր երկրպագուների ֆեյսբուքյան ֆան-էջից իմացանք, որ փետրվարի 19- ին Ձեր ծննդյան տարեդարձն է:
Operativ.am-ը շնորհավորում է ձեզ այս առիթով:
-Այո՛, այդպես է, շատ շնորհակալ եմ:
- Նույն Ձեր Ֆեյսբուքյան էջի շնորհավորանքներն ու բարեմաղթանքները մեզ հուշեցին, որ Ձեր երկրպագուների բանակը փոքր չէ: Ինչպիսի՞ն են Ձեր հարաբերությունները: Արդյո՞ք նրանք կարողանում են վայելել երգչուհի Ալլա Նավասարդյանի ներկայությունն իրենց կողքին:
-Այո՛, չնայած այն բանին, որ վաղուց հեռուստաեթերով նորություն չեմ ներկայացրել, նրաք մնում են հավատարիմ ինձ, ինչի համար հպարտ եմ, և որը ինձ նոր կատարումներ ունենալու ուժ է տալիս:
Չեմ կարծում, որ ճիշտ է աշխատանքդ միայն էկրանով ներկայացնելը երկրպագուներիդ: Նրանց շնորհիվ է, որ այսօր կա Ալլա Նավասարդյան երգչուհին, և նրանք իրավունք ունեն ինձ ճանաչելու նաև որպես մարդ:
- Ինչպե՞ս եք նշում Ձեր տարեդարձը:
-Ես չեմ սիրում մեծ շուքով նշել նման տոները : Կարծում եմ, դրանք շատ անձնական են ու ամենամոտ մարդկանց հետ պետք է լինես ու տոնես: Այս տարի, սակայն, իմ ընկերուհիները որոշեցին ինձ հրավիրել իմ իսկ տարեդարձին և շատ անակնկալ ու անկեղծ տարեդարձ ստացվեց: Ուրախ եմ, որ նման մարդիկ կան իմ կողքին և շնորհակալ եմ նրանց ամեն ինչի համար:
- Իսկ ովքե՞ր են այդ ընկերուհիների թվում:
-Նաիրա Մովսիսյան, Արևիկ Սողոմոնյան, Լիլիթ Հակոբյան, Թինա Քեյ: Նրանք ցանկում է նաև Մարիամ Գալստյանը, ով 10 տարուց ավել է՝ իմ հավատարիմ երկրպագուն է՝ այժմ արդեն ինձ քույր եմ համարում: Նշեմ, որ ծննդյանս տոնն այսքանով ինձ համար չի ավարտվում: Այն շարունակելու եմ նշել նաև Գյումրիում: Ռուսական բանակի օրն ու իմ տարեդարձը կհամատեղեմ. համերգային ծրագրով հանդես կգամ զինծառայողների առաջ:
- Ու՞մ նվերը հատկապես Ձեզ դուր եկավ :
- Բոլորի նվերներն էլ հետաքրքիր էին և գեղեցիկ, սակայն առավել տպավորիչն ու հաճելին եղբորս նվիրածն էր, ով ապրում է ՌԴ-ում: Աշխատանքից եկա ու տեսա, որ նվերս ինձ է սպասում:
- Ինչպե՞ս է սկսվել երգչուհու Ձեր կարիերան:
-Ես և երգելու իմ կարողությունը ծնվել ենք մեկտեղ, սակայն ավելի լուրջ զբաղվել եմ երգարվեստով, երբ գիտակցաբար այն ընտրեցի որպես մասնագիտություն:
Առաջին քայլերս սկսել եմ հոգևոր երգչախմբից, այնուհետև ընդունվել եմ ՀՀ Ջազային և Էստրադային արվեստի քոլեջ: Թեև միաժամանակ սովորել եմ և՛ ժողովրդական և՛ էստրադային բաժիններում, սակայն ինձ ավելի հարազատ է ժողովրդական երգը:
Պրոֆեսիոնալ երգչուհու առաջին բեմելս եղել է «Կռունկ»ամենամյա երգի փառատոնը:
- Ովքե՞ր են եղել Ձեր ուսուցիչները, և հատկապես ու՞մ ձեռագիրն է նկատելի Ձեր երգարվեստում:
-Ամենից առաջ միշտ խոնարհվում եմ երջանկահիշատակ Լուսինե Զաքարյանի առջև, ով ինձ ճիշտ երգի ու ճիշտ մարդ մնալու ուղղություն է տվել:
Շնորհակալ եմ նաև Աշոտ Բզնունուն, Իդա Ջանիբեկյանին , Ռուբեն Մաթևոսյանին, Ակսել Բակունցին ու շատ այլ մեծանուն արվեստագետների:
- Ձեր կատարմամբ, ո՞ր երգն են ամենաշատը նախընտրում :
- Բոլոր երգերս էլ պահանջարկ ունեն, սակայն չնայած նրան, որ ժամանակն առաջ է շարժվում, ինձ մշտապես խնդրում են կատարել Կոմիտասի գրառմամբ «Դլե յաման»-ը և Առնո Բաբաջանյանի «Փետուրիկ» երգը՝ գրված լուսահոգի Վալենտինա Տալկունովայի համար, որը հնչել է «Հարսնացուն հյուսիսից» ֆիլմում: Այս երկու երգերն էլ շատ մեղեդային են ու համահունչ իմ ներշխարհին:
- Կպատմե՞ք որևէ զվարճալի դեպք՝ կապված բեմի հետ:
-Վերջերս զվարճալի նման մի բան պատահեց: Բարձրացա բեմ ու երգի կեսից մինուսն անջատվեց: Ես, ինչպես միշտ, անկաշկանդ շարունակեցի երգել ու ավելի բուռն ծափահարությունների արժանացա: Երևի մտադրված էին անջատել, որպեսզի տեսնեն՝ իսկապե՞ս կենդանի եմ կատարում, թե՝ ոչ:
- Ալլա, ինչո՞վ է պայմանավորված ձեր լռությունը երգարվեստում:
-Երբեմն դադար է պետք, որպեսզի դատարկվի միտքդ ու հոգիդ, որ նոր մտքի տեղ լինի: Կարծում եմ՝ յուրաքանչյուր ստեղծագործողի մոտ այդպես է, ուղակի ինձ որոշակի հիասթափություններն էին խանգարում, որ դադարը երկար չտևեր:
- Ին՞չ սպասենք Ալլա Նավասարդյանից առաջիկայում:
-Ես միշտ չեմ բարձրաձայնում դեռ չավարտված գործերիս մասին, բայց կասեմ, որ Ալլա Նավասարդյանը ակտիվ աշխատում է նոր երգերի ու նոր ձայնասկավառակի վրա: Ավարտելուն պես վստահ կտեղեկացնեմ այդ մասին:
Շնորհակալություն անկեղծ զրույցի համար: Operativ.am-ը ևս մեկ անգամ շնորհավորում է Ձեր տարեդարձը, մաղթում ենք բուռն ստեղծագործական կյանք:
Կարինե Գևորգյան