Երևանում «Արմ Սվիթ» ՍՊԸ-ի պետի մոտ հայտնաբերվել են թմրամիջոցներ

Մարտի 18-ին թմրանյութի հայտնաբերման դեպք է տեղի ունեցել Երևանում։ Ժամը 19։30-ի սահմաններում ՀՀ Ներքին գործերի նախարարության ոստիկանության քրեական ոստիկանության գլխավոր վարչության Երևան քաղաքի վարչության թմրանյութերի ապօրինի շրջանառության դեմ պայքարի բաժնի ծառայողները իրացնելով ստացված օպերատիվ տեղեկությունները ՀՀ ՆԳՆ ոստիկանության Պարեկային ծառայության Երևան քաղաքի գնդի 2-րդ գումարտակի 2-րդ վաշտի ծառայողների հետ համատեղ ձեռնարկված միջոցառումների շնորհիվ Սասնա Ծռեր փողոցի 1/7 հասցեի մոտից թմրամիջոց ձեռք բերելու, պահելու և օգտագործելու կասկածանքով ձերբակալել և Երևան քաղաքի վարչություն են տեղափոխել Երևանի բնակիչ 32-ամյա Մարտիրոս Շ․-ին՝ իր վարած «Ford» մակնիշի ավտոմեքենայով հանդերձ։

Ինչպես հայտնում է ֆոտոլրագրող Գագիկ Շամշյանը, արդեն ոստիկանությունում նրա անձնական խուզարկությամբ հայտնաբերվել է կախազարդ լցված 0.64 գր. «Հերոին» տեսակի թմրամիջոցին նմանվող զանգվածով և 3 հատ փաթեթներ համապատասխանաբար լցված 0.77 գր., 0.33 գր. «Շոկո» տեսակի թմրամիջոցին նմանվող զանգվածներով և 0.25 գր. «Մարիխուանա» տեսակի թմրամիջոցին նմանվող զանգվածով:

Դեպքի փաստով Երևանի քրեական վարչությունում փաստաթղթեր են կազմվել, որոնք Մարտիրոս Շ․-ի հետ միասին ներկայացվել են ՀՀ Քննչական կոմիտեի Երևան քաղաքի քննչական վարչության Աջափնյակի քննչական բաժին, իսկ ավտոմեքենան  տեղափոխվել է Երևանի քրեական վարչության հատուկ պահպանվող տարածք:

Գ․ Շամշյանի տեղեկություններով Մարտիրոս Շ․-ն աշխատում է «Արմ Սվիթ» ՍՊԸ-ում, որպես արտադրամասի պետ։