Ինչ ճանապարհ է առաջարկել Իրանը Ադրբեջանին և ինչ պայմաններով. դեսպան Սոբհանին պարզաբանում է

Նախկինում Ադրբեջանը ունեցել է Իրանի տարածքով դեպի Նախիջևան հաղորդակցության ուղի: 2020 թվականի պատերազմից հետո ադրբեջանցիներն ավելի մոտեցան և՛ Հայաստանի սահմանին, և՛ Իրանի սահմանին: Նախկին երթուղին, որն ադրբեջանցիներն օգտագործում էին դեպի Նախիջևան բեռնափոխադրում իրականացնելու համար, համեմատաբար երկար երթուղի էր: Այդ մասին ասուլիսի ժամանակ ասաց ՀՀ-ում Իրանի դեսպան Մեհդի Սոբհանին՝ անդրադառնալով լրագրողի մեջբերմանը, թե ըստ վարչապետ Նիկոլ Փաշինյանի՝ Հայաստանը պատրաստ է ճանապարհ տալ Ադրբեջանին այն պայմաններով, ինչ Իրանը:

Ըստ դեսպանի՝ առաջարկվել է, որ Իրանից Նախիջևան անցնող վերոնշյալ երթուղու մեծ մասն անցնի Ադրբեջանի տարածքով, մնացած մասը՝ Հայաստանի և Իրանի սահմանին մոտ տարածքով:

«Ուստի մենք ադրբեջանական կողմին առաջարկեցինք, որ նոր կետով կարողանան շարունակել իրենց բեռնափոխադրումները դեպի Նախիջևան: Երբ ավարտեն այդ ճանապարհաշինական աշխատանքները, ադրբեջանական բեռնատար ավտոմեքենաները կարող են այդ նոր երթուղով հասնել Նախիջևան, որի երկարությունը կազմում է 50 կմ:

Այդ երթուղին, որ անցնում է Իրանի տարածքով, ամբողջովին Իրանի ինքնիշխանության, տարածքային ամբողջականության ներքո է, և՛ մաքսային արարողությունները, և՛ կանոնակարգերն իրականացվում են Իրանի օրենսդրությամբ, և դա տրանսպորտային երթուղի է»,- ասաց նա: