Մինչև 18 տարեկան անձանց էներգետիկ ըմպելիքների վաճառքն արգելող նախագիծն ընդունվեց. ԱԺ քվեարկությունն ավարտվեց

Ազգային ժողովի նիստին առաջին և երկրորդ ընթերցմամբ ու ամբողջությամբ ընդունվեցին մի շարք նախագծեր:

Առաջին ընթերցմամբ ընդունվածների թվում է «ՀՀ օրհներգի մասին» օրենքում առաջարկվող փոփոխությունների նախագիծը, որով նախատեսվում է ՀՀ օրհներգի նկատմամբ միասնական ստանդարտ սահմանել վերջինիս տեքստի, երաժշտության, տևողության, երաժշտության մասով:

«ՀՀ օրհներգը պետք է սկսվի այն քառատողով, որով սկսվել է, բայց ավարտվի գործող օրհներգի տեքստում գրված երկրորդ քառատողով, այսինքն՝ «…Թող միշտ պանծա Հայաստան»-ով»,- ասել էր նախագծի հեղինակ, «Քաղաքացիական պայմանագիր» խմբակցության պատգամավոր Սիսակ Գաբրիելյանը:

Ընդունվեց նաև «Հայաստանի Հանրապետության ու Վերակառուցման և զարգացման միջազգային բանկի միջև «Հայաստանի էներգետիկ անցումն ապահովող ծրագիր» վարկային համաձայնագիրը վավերացնելու մասին նախագիծը, որով նախատեսվում է ՀՀ-ին տրամադրել 40 մլն դոլար վարկ՝ իրականացնելու Հայաստանի էներգետիկ անցումն ապահովող ծրագիրը:

Երկրորդ ընթերցմամբ և ամբողջությամբ ընդունված նախագծերի թվում է ««Առևտրի և ծառայությունների մասին» ՀՀ օրենքում լրացումներ կատարելու մասին» և կից ներկայացված օրինագծերի փաթեթը: Նախատեսվող փոփոխությունների հեղինակները՝ պատգամավորներ Ալխաս Ղազարյանը, Հակոբ Արշակյանը, Բաբկեն Թունյանը, Սոնա Ղազարյանը, Արուսյակ Ջուլհակյանը, Արսեն Թորոսյանը, Մարիամ Պողոսյանը, Հասմիկ Հակոբյանը, առաջարկում են արգելել 18 տարին չլրացած անձանց ալկոհոլային խմիչքների և էներգետիկ ըմպելիքների վաճառքը կամ այլ ձևով իրացումը: Կսահմանափակվի նաև էներգետիկ ըմպելիքների գովազդը՝ սահմանելով վարչական պատասխանատվություն արգելքներն ու սահմանափակումները խախտելու համար:

Երկրորդ ընթերցմամբ և ամբողջությամբ ընդունված նախագծերի թվում էին նաև «ՀՀ քաղաքացիության մասին» և «Պետական տուրքի մասին» օրենքներում առաջարկվող փոփոխությունները և լրացումները, համաձայն որոնց՝ ստեղծվելու է մեկ միասնական հարթակ, որի շրջանակում ընդունվելու են ինչպես քաղաքացիության շնորհման, այնպես էլ դադարեցման դիմումները:

Այսօր՝ ժամը 16:30-ին, կլինի Ազգային ժողով-Կառավարություն հարցուպատասխան: