Հայկական կողմը դեմ է արտահայտվել Մոսվկայի երկու ցանկություններին. որոնք են դրանք՝ Բլեյանը մանրամասնում է

Հայաստանը փորձում է նվազեցնել ռուսական ագրեսիվ գործողությունները՝ թե՛ ուղիղ կերպով, թե՛ միջնորդավորված։

«Հայկական ժամանակ»-ի հետ զրույցում նման տեսակետ է հայտնում «Հանուն հանրապետության» կուսակցության արտաքին գործերի քարտուղար Առնոլդ Բլեյանը՝ անդրադառնալով Մոսկվայում Լավրով-Միրզոյան հանդիպմանը և այդ հանդիպման ընթացքում հնչած հայտարարություններին։

Վերջինս նկատում է՝ պետք է հաշվի առնել, որ հանդիպումը պլանավորած էր եղել դեռևս երեք ամիս առաջ, սակայն այն տեղի ունեցավ ԵՄ նախագծին՝ ՀՀ կառավարության հավանություն տալուց և ԱՄՆ-ի հետ կնքված փաստաթղթի ստորագրումից հետո, հետևաբար հայկական կողմը նպատակ ունի հրաժարվել Սերժ Սարգսյանի և Ռոբերտ Քոչարյանի վարած պրոռուսական քաղաքականությունից և բալանսավորել այդ քաղաքականությունը։

«Հիմա պետք է սպասել Լավրովի այցին Երևան, որի մասին հաղորդվեց հանդիպման ընթացքում։ Գետնի վրա պետք է զարգացումները տեսնենք․ Լավրովի այցից հետո ի՞նչ գործնական քայլեր կարվեն՝ Հայաստանին ՌԴ-ից կախվածության մեջ գցելու համար, ինչպես կզարգանան Արևմուտքի հետ հարաբերությունները։ Կարծում եմ՝ ամեն դեպքում չի լինի ամենաահավոր սցենարը, այլ Հայաստանը դուրս կգա կործանված «Տիտանիկ»-ից՝ Ռուսաստանից»,- ասում է նա։

Առանձնացնելով Լավրովի այն հայտարարությունը, թե ամենաբարձր մակարդակով ձեռք բերված եռակողմ պայմանավորվածությունները շարունակում են ակտուալ մնալ՝ հաշվի առնելով Հրվ. Կովկասում առկա իրավիճակը, Բլեյանը շեշտում է՝ այդ պայմանավորվածությունների մասին, այսպես, թե այնպես, հիշեցնում են Հայաստանում գտնվող Ռուսաստանի ներկայացուցիչները, սակայն դա այդքան էլ լուրջ հայտարարություն չէ։ Այստեղ կարևորվում է Արարատ Միրզոյանի մեջբերած հայտարարությունը, այն է՝ Հայաստանը պատրաստ է ապաշրջափակել բոլոր տնտեսական և տրանսպորտային հաղորդակցությունները, ինչը նախատեսված է «Խաղաղության խաչմերուկ»-ի շրջանակում։

«Հայաստանի ՌԴ ներկայացուցիչներն անդադար խոսում են այդ պայմանավորվածությունների մասին, հատկապես՝ շեշտում 9-րդ կետի կատարման մասին։ Կարծում եմ՝ որքան էլ խոսվի, մենք պետք է դուրս գանք այդ պայմանավորվածություններից։ Եթե Ալիևը նախապայմաններ է դնում, մենք նույնպես պետք է նմանատիպ քայլի գնանք։ ՀՀ Ազգային ժողովը պետք է քննարկի և քաղաքական գնահատական տա այդ կետի կատարմանը»,- նշում է նա։

Ռուսաստանը հայ-ադրբեջանական կարգավորման հարցում որևէ մեկի կողմից չէ, Լավրովի այս մտքին էլ ի պատասխան՝ զրուցակիցը հիշեցնում է՝ բոլորի համար է պարզ, որ Ռուսաստանի շահերը համընկնում են միայն Ադրբեջանի հետ․ «Դրա մասին խոսում է նաև Ֆրանսիայի նախագահը՝ Մակրոնը։ Ակներև է, որ տարածաշրջանում գոյություն ունի ռուս-ադրբեջանական տանդեմ։ ՌԴ-ն չի կարող դիտվել չեզոք երկիր։ Մեզ մնում է հույս հայտնել, որ Թրամփը կլինի այն խաղաղարարը, որ կվերագործի վաշինգտոնյան հարթակը հայ-ադրբեջանական հարաբերությունների կարգավորման համար»։

Սյունիքում ՌԴ հյուպատոսություն բացելու և դիվանագիտական ներկայացուցչությունների ընդլայնման հարցերն էլ, ըստ Բլեյանի, չնայած քննարկվել են հանդիպմանը, սակայն հայկական կողմը հավանություն չի տալիս Մոսկվայի այդ երկու ցանկություններին․ «Ունեմ տեղեկատվություն, որ հայկական կողմը դեմ է արտահայտվել երկու հարցերին էլ։ Մեզ պետք է Սյունիքի ապառուսականացում, որքան քիչ ռուս լինի այնտեղ, ռուսների ներկայություն չլինի, Սյունիքը կմնա ՀՀ տարածքում, կլինի պաշտպանված, հակառակը՝ կբերի ՀՀ անկախության կորստին»։

Վերջինս անհասկանալի է որակում Լավրովի այն հայտարարությունը, թե երկկողմ հարաբերությունները զերծ պետք է մնան արտատարածաշրջանային ուժերի բացասական ազդեցությունից:

«Այստեղ արտատարածաշրջանային երկիր միայն Ռուսաստանն է։ Բացի դրանից՝ անհասկանալի է, թե ինչո՞ւ միայն Հայաստանը իրավունք չունի համագործակցել այլ երկրների հետ․ Ադրբեջանը Նահանգներին ևս առաջարկել է ստորագրել նմանատիպ փաստաթուղթ, որը ստորագրվել է Հայաստանի հետ։ Վրաստանի Սահմանադրությունում գրված է, որ իրենք պետք է անդամակցեն Եվրամիությանն ու ՆԱՏՕ-ին»։

Այս համատեքստում դիտարկելով նաև Արարատ Միրզոյանի հայտարարությունը, որով նա հույս էր հայտնում՝ Ռուսական կողմը կխուսափի միակողմանի մեկնաբանություններից, «Հանուն հանրապետության» կուսակցության արտաքին գործերի քարտուղարն ասում է՝ Ռուսաստանը երբեք վերջ չի տա միակողմանիությանը․ «ՌԴ քաղաքականությունը չի փոխվելու, նրանք կայսերական նկրտումներ ունեն և ցանկություն տիրանալու ամբողջ արտարածաշրջանային երկրներին։ Նրանց այդ ցանկությունը կախված է ռուս-ուկրաինական բանակցությունների զարգացումներից։ Ամեն դեպքում Հայաստանը դեռևս այլընտրանք չունի Ռուսաստանից, մնում է հարաբերությունները խորացնել Արևմուտքի հետ և սպասել, թե երբ Արևմուտքում կձևավորվի անվտանգային նոր էկոհամակարգ»։

Իսկ որո՞նք են այն միջազգային հարթակները, որտեղ, ըստ ՀՀ ԱԳ Նախարարի, Երևանը փորձում է հաշվի առնել Մոսկվայի շահերը և նույնն ակնկալում է Մոսկվայից, Բլեյանը նկատում է՝ միայն այդպիսի հարթակը, որտեղ ՌԴ-ն ու Հայաստանը միասին ներկայացվածություն ունեն, Միացյալ ազգերի կազմակերպությունն է․ «Գիտենք, որ հայկական կողմի ցանկությամբ Կազմակերպությունը անվտանգության խորհրդի քննարկումներ է հրավիրել, որտեղ Ռուսաստանը բազմիցս պաշտպանել է ադրբեջանական ցանկությունները։ ՀԱՊԿ, Մինսկի խումբը դե յուրե կան, սակայն դե ֆակտո չկան»։

Ընդհանուր առմամբ, «Հանուն հանրապետության» կուսակցության արտաքին գործերի քարտուղար Առնոլդ Բլեյանի խոսքով, այն, ինչ Լավրովն ասաց հանդիպմանը, միայն Ռուսաստանի ցանկություններն են, դրանք Հայաստանի կողմից ենթակա չեն անմիջապես կատարման։ Իշխանությունը պետք է շարունակի Ռուսաստանին հեռվից նայել, հակառակ դեպքում, ըստ զրուցակցի, «այրվելու» է։

Արևմուտքում էլ այս հանդիպումը ևս կդիտարկվի Հայաստանի կողմից զգուշավորություն․ պարզ է՝ քանի դեռ Նահանգները չի հստակեցրել, թե որ ուղղությամբ է գնալու, աշխարհը անորոշության մեջ է։