Բախվել են «BMW»-ն ու «Mitsubishi»-ն. կա 2 վիրավոր

Օգոստոսի 9-ին, խոշոր ավտովթար է տեղի ունեցել Երևանում։ Ժամը 19:00-ի սահմաններում Թևոսյան և Ա. Հովհաննիսյան փողոցների խաչմերուկում բախվել են Երևանի բնակիչներ 22-ամյա Կարեն Մարգարյանի վարած «BMW 325» մակնիշի և 59-ամյա Ռուբեն Սերոբյանի վարած «Mitsubishi RVR» մակնիշի ավտոմեքենաները։

Ինչպես դեպքի վայրից հայտնում է ֆոտոլրագրող Գագիկ Շամշյանը, վթարի հետևանքով 2 վարորդները մարմնական վնասվածքներով տեղափոխվել են «Սուրբ Գրիգոր Լուսավորիչ» բժշկական կենտրոն։

Վիրավորներին առաջինն օգնության են հասել քաղաքացիները, օպերատիվորեն ժամանած ՀՀ Ներքին գործերի նախարարության Փրկարար ծառայության Երևանի թիվ 9-րդ հրշեջ-փրկարարական ջոկատի փրկարարները, շտապօգնության բժիշկների հերթապահ խումբն ու տեղում ծառայություն կատարող պարեկները։

Փրկարարները «Mitsubishi» ավտոմեքենայից դուրս են բերել վարորդին և պատգարակով մոտեցրել շտապօգնության ավտոմեքենային։

Բժիշկները վիրավորներին մինչև հիվանդանոց տեղափոխելը տեղում առաջին բուժօգնությունն են ցուցաբերել։

Վիրավորներից մեկին դեպքի վայրից հիվանդանոց է ուղեկցել վաշտի հրամանատարի տեղակալ Վարդան Խոցանյանը։

Վթարի փաստով քննչական բաժնում նախաձեռնվել է քրեական վարույթ։