Աղջիկներին շատ հաճախ ընդամենը վստահությունն է պակասում․ Ժաննա Անդրեասյան
![](/timthumb.php?src=disc/27-07-24/3246cefbefe5abce187646aa0fe2604b.jpg&w=450)
ՀՀ կրթության, գիտության, մշակույթի և սպորտի նախարար Ժաննա Անդրեասյանն այսօր մասնակցել է FemInno կանանց նորարարական միջազգային համաժողովի մեկնարկային միջոցառմանը։
Երրորդ անգամ անցկացվող համաժողովը կրում է GenAI in Action: Big Data, Big Impact. (Գեներատիվ արհեստական բանականություն, մեծածավալ տվյալներ, մեծ ազդեցություն) խորագիրը և նպատակ ունի Հայաստանում բիզնեսի, գիտության և տեխնոլոգիաների ոլորտում ներկայացնել կանանց տաղանդն ու նպաստել նրանց զորեղացմանը, ինչպես նաև կանանց կապել տեխնոլոգիաների հետ՝ խթանելով նրանց շրջանում այս ոլորտի հանդեպ հետաքրքրվածությունը։ Այս տարի կոնֆերանսի ընդհանուր թեման արհեստական բանականությունն է։
Ողջունելով ներկաներին՝ Ժաննա Անդրեասյանը կարևորել է նմանօրինակ հարթակների զարգացումն ու տարածումը: «Համոզված եմ՝ մեր աղջիկներին շատ հաճախ ընդամենը վստահությունն է պակասում: Նմանօրինակ միջավայրերը, որտեղ հնարավորություն կա տեսնելու ուժեղ կանանց, լսելու նրանց հաջողությունների մասին և ստեղծելու համագործակցության հեռանկարներ, վստահ եմ՝ թույլ կտան հաղթահարել սեփական վախերն ու գնալ մեծ երազանքների հետևից: Սա նաև կրթության անելիքն է, որին մենք հանձնառու ենք մեծ պատասխանատվությամբ: Չորս տարի առաջ այս օրերին մենք քննարկում էինք Հանրակրթության նոր չափորոշիչը, իսկ այսօր արդեն խոսում ենք դրա արդյունքների մասին: Հանրակրթության նոր չափորոշիչը, որի հատուկ շեշտադրումն է ԲՏՃՄ ուղղությունների զարգացումը, արդեն փորձարկվել է և այժմ փուլային եղանակով տեղայնացվում է ՀՀ բոլոր դպրոցներում։ Չափորոշչի փորձարկման անկախ գնահատման արդյունքները ցույց են տալիս, որ այն գենդերազգայուն է և աղջիկներին խրախուսում է սովորել ԲՏՃՄ առարկաները, գրանցել հաջողություններ և շարունակել իրենց ուսումնասիրությունները»,- ասել է Ժաննա Անդրեասյանը:
ԿԳՄՍ նախարարը ներկայացրել է նաև ՀՀ կառավարության գործադրած ջանքերը՝ մասնավորապես կրթական ենթակառուցվածքների բարելավման, ուսուցիչների մասնագիտական կարողությունների զարգացման և խրախուսման ուղղությամբ:
Ժաննա Անդրեասյանը տեղեկացրել է՝ ՀՀ բոլոր դպրոցներում ստեղծվում են բնագիտական առարկաների լաբորատորիաներ, որոնք, նախարարի դիտարկմամբ, գիտելիքները փորձարկելու և դրանց կիրառությունը տեսնելու հնարավորություն են ապահովում:
Նա նաև նշել է՝ լաբորատոր սարքավորումների գործարկման և բնագիտական լաբորատորիաների ուղղությամբ ուսուցիչների կարողությունների զարգացման նպատակով պարբերաբար անցկացվում են վերապատրաստման դասընթացներ: Նախարարն անդրադարձել է նաև բնագիտական առարկաներ դասավանդող ուսուցիչների խրախուսման մեխանիզմներին՝ տեղեկացնելով, որ նախորդ տարվանից մեկնարկել է ԲՏՃՄ առարկաներ դասավանդող ուսուցիչների հավելավճարի ծրագիրը՝ երիտասարդ ուսուցիչների մուտքը դպրոցներ խրախուսելու համար: ԿԳՄՍ նախարարի խոսքով՝ այս տարվա արդյունքներով ավելի քան 3000 նոր ուսուցիչներ են սկսել իրենց աշխատանքը հանրակրթական ուսումնական հաստատություններում:
Ժաննա Անդրեասյանը ներկայացրել է նաև տեխնոլոգիական կրթության զարգացմանը միտված ծրագրերը, որոնք հետաքրքրություն են առաջացրել տարբեր երկրներում: Այս համատեքստում նա, մասնավորապես, նշել է ԹՈՒՄՈ կենտրոնի ոչ ֆորմալ կրթական ծրագրերը, որոնք մեծապես զարգացնում են երեխաների տեխնոլոգիական կրթության հնարավորություններն ու ստեղծագործականությունը:
Նախարարը անդրադարձել է նաև ՀՀ դպրոցներում իրականացվող ռոբոտաշինության և ինժեներական «Արմաթ» լաբորատորիաների, ինչպես նաև 16 ավագ դպրոցներում 2023 թ. սեպտեմբերից մեկնարկած «Արհեստական բանականության (ԱԲ) սերունդ» կրթական ծրագրերին: «Վստահ եմ՝ տեխնոլոգիական կրթության ոլորտում Հայաստանը մեծ ներուժ ունի և արդեն իսկ բավական մրցունակ է: FemInno-ն և նմանօրինակ մյուս հարթակներն օգնում են մեր ընդհանուր օրակարգերին: Շատ ոգևորիչ և գոտեպնդող է տեսնել, որ մեծ թվով մարդիկ հավաքվել են լավ գաղափարների քննարկման շուրջ: Սա նշանակում է՝ ամեն ինչ, այդ թվում՝ այսօրվա մարտահրավերները, հաղթահարելի են»,- նշել է Ժաննա Անդրեասյանը՝ շնորհակալություն հայտնել միջոցառման կազմակերպիչներին:
FemInno-ի հիմնադիր Սեդա Պապոյանը, ողջունելով համաժողովի մասնակիցներին, նշել է, որ կոնֆերանսը նպատակ ունի ցույց տալ, որ Հայաստանի կանայք նորարարության ոլորտում բավարար տաղանդ և ունակություններ ունեն:
Միջոցառման շրջանակում հայտարարվել է նաև Նորարարության և տեխնոլոգիաների համաշխարհային կոնգրեսի` WCIT-ի հետ գործընկերության մեկնարկի մասին:
FemInno երկօրյա տեխնոլոգիական համաժողովում նախատեսվում են մի շարք ելույթներ ու քննարկումներ․ ներկայանալու են խոսնակներ աշխարհի տարբեր երկրներից՝ ԱՄՆ-ը, Մեծ Բրիտանիա, եվրոպական այլ երկրներ։
FemInno-ն երկու անգլերեն բառերի՝ «Feminine» և «Innovation» (կանացի և նորարարություն) բառերի միացությունն է։