Նոր օլիգարխներ՝ նոր «կտուրներ». ՄՊՀ-ն անզո՞ր է Ռոմանոս Պետրոսյանի ընկերոջ դեմ

ՄՊՀ նախագահ Գեղամ Գևորգյանը, ինչպես երևում է, այնքան էլ չի հաջողում մենաշնորհների և հակամրցակցային վարքի դեմ իր ծավալած պայքարում: Ամիսներ առաջ պարզվել է, որ «Շիրակ» թռչնաֆաբրիկան, ըստ ՏՄՊՊՀ-ի, հասարակությանը մոլորեցնելով, «Էկո», «էկոդեմոնստրատոր» եւ «օրգանիկ» բառերով հավկիթ է արտադրել, ինչը օրենքի խախտում է: Ավելին՝ Հանձնաժողովը հանձնարարել է նաեւ «Շիրակ» ընկերությանը, որ ամբողջությամբ հավաքի արտադրված հավկիթները բոլոր խանութներից: «Ժողովուրդ» օրաթերթը արձանագրել է, որ մինչ օրս մի շարք խանութներում վաճառվում են «ԷԿՈ» մակնշմամբ հավկիթներ՝ շրջանցելով Հանձնաժողովի որոշում-արգելքը: Ինչպե՞ս է ստացվում, որ արգելքի որոշման առկայության պայմաններում այսօր առեւտրի կենտրոններում վաճառվում են «Արզնի» եւ «Շիրակ» թռչնաֆաբրիկաների կողմից արտադրված «ԷԿՈ» մակնշմամբ հավկիթներ:

Ինչպես երևում է` ՄՊՀ նախագահ Գեղամ Գևորգյանին չի հաջողվում սանձել «Շիրակ» թռչնաֆաբրիկայի սեփականատեր, իշխանությունների սրտի նորաթուխ օլիգարխ Նարեկ Նալբանդյանին, ով, հիշեցնենք, նաև «Գոլդեն Փելըս» հյուրանոցային համալիրի նոր սեփականատերն է, իսկ մամուլը համառորեն պնդում է, որ վերջինս բավական սերտ կապեր ունի ՊՎԾ պետ Ռոմանոս Պետրոսյանի հետ: Գեղամ Գևորգյանը չի՞ կարողանում, թե՞ չի ցանկանում վերջ դնել Նոր Հայաստանում օրը ցերեկով տեղի ունեցող ամենաթողությանը, որը դրսևորում են նորաթուխ օլիգարխները: Թե խնդիրն այլ է, երբ Գեղամ Գևորգյանը ոչ թե չի կարող, այլ չի ցանկանում դա անել: Երկու դեպքում էլ սա պետք է դառնա պատկան մարմինների ուսումնասիրության առարկա, քանի որ հպարտ քաղաքացիներին իշխանությունները խոստում էին տվել՝ կոտրել մենաշնորհների ողնաշարը և վերացնել օլիգարխ հասկացությունը: Այն, ինչին այսօր ականատես ենք լինում, ոչ առաջինն է, ոչ էլ երկրորդը: Այսօր ՄՊՀ լուռ համաձայնությամբ շուկայում բառի բուն իմաստով վակխանալիա և ամենաթողություն է տեղի ունենում, իհարկե, սպառողների գրպանի հաշվին:

Արդեն ակնհայտ է, որ «Քաղաքացիական պայմանագիր» կուսակցությունը Նարեկ Նալբանդյանի դեմքով իր սրտի օլիգարխն է կերտում: Եթե Նարեկ Նալբանդյան անունը ոչինչ չի ասում, ապա հիշեցնենք` ամիսներ առաջ հայտնի դարձավ, որ Ծաղկաձորի «Գոլդեն Փելիս» հյուրանոցային համալիրը 5 մլրդ դրամով գնել է «Պրոյեկտ ինտեր-ինվեստ» ՍՊԸ-ն, որի 100% բաժնետերը Նարեկ Նալբանդյանն է, որն այս ընկերությունը ձեռք է բերել 2018-ի դեկտեմբերին Մայիլ Թորոյանից: «Պրոյեկտ ինտեր-ինվեստ» ընկերության համար 2019-ին կառավարությունը արտոնություններ էր սահմանել՝ ներդրումային ծրագրի շրջանակներում 3 տարի ժամկետով հետաձգել ընկերության համար ԱԱՀ-ից, ինչպես նաեւ ազատել մաքսատուրքից՝ ներդրումային ծրագրի շրջանակներում։

Այնուհետև Նալբանդյանի անունը կրկին հնչեց` այս անգամ արդեն նախկին վարչապետ Հովիկ Աբրահամյանի առանձնատունը գնելու լուրերի ֆոնին։ Եվ ընդամենը շաբաթներ առաջ հայտնի դարձավ, որ Սևանի ափամերձ տարածքների մաքրման աշխատանքները որոնք, հիշեցնենք, մրցույթով են կազմակերպվելու, չի բացառվում իշխանությունները շնորհեն հենց Նալբանդյանի ՍՊԸ-ին։ Այդպիսի սցենարի հավանականությունը չի հերքել Սևան ազգային պարկի տնօրենը, ում, հիշեցնենք, այդ պաշտոնին են նշանակել ՊՎԾ պետ Ռոմանոս Պետրոսյանի ջանքերի շնորհիվ։ Եվ այս տեսանկյունից` Սևանի ափամերձ տարածքներում մաքրման աշխատանքները նրան հանձնելը, ինչը, անշուշտ, յուղոտ պատառ է, նույնպես պատահական չէ և պարզ զուգադիպությունների շարքից չէ։ Ստացվում է, որ օլիգարխներից Սևանը մաքրել խոստացող Պետրոսյանն այժմ այդ ափերը տրամադրում է իր մտերիմ Նալբանդյանին։

Ինչ է ստացվում. նախկին իշխանություններին ընդդիմադիրները հաճախ էին մեղադրում այս կամ այն օլիգարխի, մեծահարուստի կտուր դառնալու մեջ, պատկան մարմինները այդ գործարարների դիմացը որևէ կերպ առնել չէին կարող և, հետևաբար նրանք անում էին այն, ինչ ուզում էին: Արդյո՞ք այժմ մենք ականատես չենք դառնում նույն իրավիճակին, փոխվել են միայն կտուրները և օլիգարխները...

Աղբյուրը