Խորհրդարանական ճգնաժամն ակնհայտ է․ իշխանությունները փորձում են ԱԺ-ն ցրելու հիմքեր ձևավորել․ քաղաքագետ․ 24news.am

Խորհրդարանում իսկապես լուրջ ճգնաժամ է ձևավորված, և քաղաքական երկխոսության որևէ հնարավորություն այս պահին իրապես չկա, 24news.am-ի հետ զրույցում ասել է քաղաքագետ Հրանտ Մելիք-Շահնազարյանը։

Քաղաքագետը ընդգծել է՝ իշխանություններն իրենք չեն ուզում, որ խորհրդարանական ընդդիմությունը ԱԺ-ում շարունակի իր աշխատանքը։

«Սա միանշանակ է։ Ավելին, իմ տպավորությամբ, իշխանություններն ամեն ինչ անում են խորհրդարանը ցրելու լեգիտիմ հիմքեր ձևավորելու համար, որ փորձեն նոր ընտրությունների միջոցով հաղթահարել նաև երկրում ստեղծված քաղաքական ճգնաժամը, ինչպես դա նրանց հաջողվել է 2021 թվականի արտահերթ խորհրդարանական ընտրությունների ժամանակ»,- ասել է Հրանտ Մելիք-Շահնազարյանը։

Մյուս կողմից, նրա խոսքով, ընդդիմության օրակարգն ավելի քան պարզ է ու հստակ․ պահանջներն են՝ Արցախը չի լինելու Ադրբեջանի կազմում, զիջումներն անթույլատրելի են, այնինչ գործող իշխանությունը տրամագծորեն հակառակ վարքագիծն է դրսևորում՝ ի վնաս Հայաստանի և Արցախի պետական շահերի։ Այս իրավիճակում իշխանության և ընդդիմության հակասությունները, ըստ Մելիք-Շահնազարյանի, խորանում ու ավելի են խորանալու։

«Համոզված եմ, որ ընդդիմությունը խորհրդարան չի գնալու։ Գիտեմ նաև, որ նախաձեռնություններ կարող են լինել նաև խորհրդարանական ընդդիմության կողմից, որոնց պարագայում էլ իշխանությունը չի գալու խորհրդարան։ Այսինքն, այնպես չէ, որ միայն ընդդիմությունը չի գնում խորհրդարան․ ընդդիմության նախաձեռնությունների դեպքում էլ իշխանությունը չի գալիս խորհրդարան։ Այս իրավիճակում խորհրդարանական ճգնաժամի առկայությունն ակնհայտ է։ Խորհրդարանը չի գործում՝ փաստացի, բայց խորանում է նաև քաղաքական ճգնաժամը երկրի ներսում, որի լուծման ուղիները տարբեր են․ ընդդիմությունը փորձելու է հասնել լիարժեք իշխանափոխության, իսկ իշխանությունները խաբելով, ինչ-որ ընտրական գործընթացներ նորից սկսելով՝ փորձելու են իրենց խնդիրն այդ ճանապարհով լուծել»,- նշել է քաղաքագետը։

Հրանտ Մելիք-Շահնազարյանն այս համատեքստում հիշեցրել է իշխանության ունեցած ադմինիստրատիվ լծակների մասին՝ միաժամանակ նշելով, «Իրենց փոխարեն ես այդքան հանգիստ չէի լինի՝ նույնիսկ այդ ադմինիստրատիվ լծակներով հանդերձ»։