Մեծ Բրիտանիայի ֆինանսների նախկին նախարար Ռիշի Սունակն ամրապնդել է առաջատարությունը երկրի հաջորդ վարչապետի պաշտոնին հավակնող մրցակիցների շրջանում

Մեծ Բրիտանիայի ֆինանսների նախկին նախարար Ռիշի Սունակն ամրապնդել է առաջատարությունը երկրի հաջորդ վարչապետի պաշտոնին հավակնող մրցակիցների շրջանում, գրել է Reuters-ը։

Սունակն անցած շաբաթ հրաժարական էր տվել ֆինանսների նախարարի պաշտոնից, դա մեկն էր հրաժարականների այն կասկադից, որը ստիպեց Բորիս Ջոնսոնին հրաժարական տալ։

Նա մրցակցում է Փեննի Մորդաունթի՝ առեւտրի կրտսեր նախարարի եւ արտաքին գործերի նախարար Լիզ Թրասի հետ, որն իր պաշտոնական քարոզչությունն սկսել է՝ պնդելով, որ միակ հավակնորդն է «կոշտ որոշումներ» ընդունելու փորձով։

Այժմ մնացել է հինգ հավակնորդ այն բանից հետո, երբ Brexit-ի կողմնակից, գլխավոր դատախազ Սուելա Բրավերմանը դուրս է մնացել մրցավազքից։

Սունակը, պահպանելով առաջատարությունը, Թվիթերում գրել է. «Ես պատրաստ եմ տալ ամեն ինչ, ինչ ունեմ, ի բարօրություն մեր ազգի։ Մենք միասին կկարողանանք վերականգնել վստահությունը, վերականգնել մեր տնտեսությունը եւ վերամիավորել երկիրը»։

Ավելի վաղ նա հայտարարել էր, որ իր առաջին տնտեսական գերակայությունը լինելու է պայքարը բարձր գնաճի դեմ, այլ ոչ թե հարկերի իջեցումը, որը խոստացել են նրա մրցակիցները։

Թրասը նույնպես խոստացել է վերականգնել վստահությունը քաղաքականության հանդեպ՝ փորձելով հեռու մնալ ավելի անձնական եւ դաժան ճեպազրույցներից եւ հակամարտող ճամբարների կոնտր-ճեպազրույցներից։

«Ես պահպանողական եմ եւ կառավարելու եմ որպես պահպանողական։ Ես կարող եմ ղեկավարել, կարող եմ դժվար որոշումներ կայացնել եւ հասնել նպատակիս։ Ես պատրաստ եմ դառնալ վարչապետ առաջին իսկ օրվանից»,- ասել է Թրասը։

Մնացած հավակնորդները՝ Քեմի Բադենոհը եւ Թոմ Թուգենդհաթը, երկուշաբթի կներկայանան խորհրդարանի պահպանողական անդամների առջեւ։

Եթե բոլոր թեկնածուները հաղթահարեն 30 ձայնի շեմը, նա, ով կհավաքի ամենաքիչ ձայները, դուրս կմնա մցրավազքից։ Հաջորդ քվեարկություններն ամեն անգամ կբացառեն ամենաքիչ ձայներն ունեցող թեկնածուին, որպեսզի հուլիսի 21-ին մասնակիցների թիվը հասնի 2-ի։

Այնուհետեւ նոր առաջնորդը կընտրվի երկուսից, ինչի մասին կհայտարարվի սեպտեմբերի 5-ին։

Սունակը կարող է լինել ամենապոպուլյար հավակնորդն իր գործըկերների շարքում, բայց YouGov-ի հարցումը, որին մասնակցել է կուսակցության մոտ 900 անդամ, ցույց է տվել, որ Մորդաունթը ֆավորիտն է՝ հաղթելով մյուսներին երկրորդ փուլում։ Նա առջեւում է՝ Սունակից մեծ տարբերությամբ, եւ հիմա նա բուքմեքերների ֆավորիտն է։