Ժամանակն է, որ դեմոկրատները ասպարեզից հեռացնեն Բայդենին

Ջո Բայդենի տարիքի եւ հոգեկան ու ֆիզիկական առողջության հետ կապված նոր անհանգստությունները հարցի առաջ են կանգնեցնում. ինչպիսի՞ն է նախագահի հեռանալու իրական ռազմավարությունը։ Այս հարցն է տվել Miami Herald-ի հոդվածագիրը։

Հանգստյան օրերին Բայդենին ողջունել է երկար հոդվածը New York Times-ում՝ նրա տարիքի մասին, ընդ որում՝ անունը չնշած մի շարք օգնականներ մտավախություն են հայտնել, որ նա կընկնի կամ չի կարողանա անգամ հեռուստահուշարարից կարդալ գրվածը։ The Times-ի տվյալներով՝ Բայդենի 79-ամյա տարիքը «անհարմար խնդիր» է դառնում իր եւ կուսակիցների համար։

«Նա հաճախ ճոճվում է քայլելիս, եւ օգնականները վախենում են, որ կսայթաքի»,- տեղեկացրել է The Times-ը։ «Նա կարկամում է հանրային միջոցառումների ժամանակ, եւ նրանք, շունչները պահած, հույս են փայփայում, որ ելույթն առանց վրիպումների կավարտի»։

Նրա տարիքն արդեն բազմաթիվ հարցերի տեղիք է տվել։ Հարցն այլեւս այն չէ, թե արդյոք Բայդենը երկրորդ անգամ կառաջադրվի, այլ այն, թե կկարողանա արդյոք ավարտել այս ժամկետը։

Բայդենը բախվել է բազմաթիվ միջադեպերի՝ լինի ձեռքսեղմումը, թե նախադասությունն առանց սխալվելու ավարտելը, որոնք վկայում են այն մասին, որ նրա տարիքը «համը հանում է»։

Տեղեկացվել է, որ Բայդենը կատաղել է այն բանից, որ մեծ ուշադրություն է դարռվել հեծանվից նրա ընկնելու վրա, որն անընդհատ ցուցադրվել է հեռուստաշոուներում։

Օգնականները փորձում են թույլ տալ Բայդենին աշխատել միայն շաբաթը հինգ օր եւ հնարավորություն ստեղծել, որ հանգստյան օրերն անցկացնի Դելավերում։ Եվ նրանք մշտապես զգուշանում են նրա հերթական սխալ քայլի համար, տեղեկացրել է The Times-ը։

Որոշ դեմոկրատներ կարծում են, որ նա երկրորդ ժամկետի համար չի առաջադրվի։ Նա հազիվ 40 տոկոսի վարկանիշ է պահպանում, ավելի վատ, քան Դոնալդ Թրամփն իր նախագահության օրոք։

Բայդենը հրապարակայնորեն պնդել է, որ նախատեսում է առաջադրվել հաջորդ ժամկետի համար, բայց ներկա պահին դա ընդամենը ձեւ է։

Փաստը, որ Սպիտակ տան օգնականները շշնջում են նրա տարիքի մասին, մատնանշում է, որ նրանք մտածում են այնպես անել, որ նախագահը հեռանա։

Միջանկյալ ընտրությունների մոտենալուն զուգընթաց՝ Բայդենի ճակատագիրը կարող է ավելի վատանալ։ Նրա հեռանալու մասին լուրերը կարող են վերածվել պատմությունների այն մասին, որ նա երկար չի դիմանա։ Անգամ դեմոկրատները չեն կարողանա նրան պաշտպանել։

Բանն այն է, որ դեմոկրատների համար շատ ավելի լավ կլինի, եթե Բայդենը հրաժարական տա՝ այլ թեկնածուների համար ճանապարհ բացելով։

Եթե նա հրաժարական տա միջանկյալ ընտրություններից առաջ, արդյո՞ք դա ցնցում կլինի, որը կօգնի դեմոկրատներին պահպանել Կոնգրեսը։ Օգնականները կարող են պարզապես հրաժարականը ներկայացնել որպես առողջական, ոչ թե քաղաքական խնդիր։

Բայց Բայդենին ասպարեզից հանելը շատ ավելի դժվար կլինի, քան թվում է։