Սկսվել է հայ-թուրքական բանակցային գործընթացի երկրորդ փուլը, որի նախաձեռնողը Թուրքիան է. թուրքագետ

Թուրքական կողմը չի գնում լուրջ քայլերի, քանի որ ցանկանում է, ժամանակ շահելով, ճնշում գործադրել Հայաստանի վրա: Այս մասին ասել է թուրքագետ Ռուբեն Սաֆրաստյանը՝ անդրադառնալով Փաշինյան-Էրդողան հեռախոսազրույցին։

Ըստ նրա՝ թուրքական կողմը միտումնավոր է դա անում, որպեսզի հայ-ադրբեջանական դեռևս չսկսված բանակցություններում ճնշում գործադրի և զիջումներ կորզի հայկական կողմից:

«Սկսվել է հայ-թուրքական բանակցային գործընթացի երկրորդ փուլը, որի նախաձեռնողը Թուրքիան է: Այս փուլը կանվանեի փոքր քայլերի փուլ: Իսկ Թուրքիային հարկավոր է ցույց տալ, որ բանակցային գործընթացում դինամիկա կա: Հեռախոսազրույցը Էրդողանի և Փաշինյանի միջև երկրորդ փուլի դրսևորումներից մեկն է: Իսկ ինչո՞ւ թուրքական կողմը չի գնում այն կարևոր քայլին, այն է՝ դիվանագիտական կապերի և սահմանային ռեժիմի հաստատում: Կարծում եմ, որ դա միտումնավոր է արվում: Թուրքիան փորձում է ժամանակ շահել, թուրքական կողմը կօգտագործի հնարավոր ժամանակը Հայաստանի վրա ճնշում գործադրելու համար»,- ասաց նա:

Թուրքագետի կարծիքով՝ ներկա փուլում հնարավոր չէ Փաշինյան-Էրդողան հանդիպումը. այն, ինչ տեղի է ունենում, Թուրքիային ձեռնտու է:

«Այն պայմանավորվածությունները, որոնք ձեռք են բերվել Ռուբինյան-Քըլըչ հանդիպման ժամանակ, չեմ բացառում, որ հնարավոր է կյանքի կոչել, քանի որ դրանք առանձնապես ոչինչ չեն նշանակում: Տեխնիկական առումով էլ դա երկար ժամանակ կպահանջի: Այստեղ կարևոր է նաև թուրքական կողմի ցանկությունը: Իսկ ինչ վերաբերում է երրորդ երկրների քաղաքացիների համար սահմանի բացմանը, ապա կասեմ, որ դա հիմնականում արվում է Ադրբեջանի համար: Աստված գիտի, թե այդ քաղաքացիների մեջ ովքե՞ր և ի՞նչ ծառայության ներկայացուցիչներ կլինեն»,- ասաց Սաֆրաստյանը: