ԵՊՀ ռեկտորի պաշտոնակատարը փակվել է աշխատասենյակում. ԱԺ ընդդիմադիր պատգամավորները, որոնք մտել էին ԵՊՀ շենք, հանդիպելու նրա հետ, ձեռնունայն դուրս եկան

ԱԺ ընդդիմադիր պատգամավորները, որոնք քիչ առաջ մտել էին ԵՊՀ շենք, հանդիպելու ռեկտորի պաշտոնակատարին եւ մյուս ղեկավարներին, ձեռնունայն դուրս եկան:

Նախ, սկզբում ԵՊՀ ռեկտորի պաշտոնակատար Հովհաննես Հովհաննիսյանի մամուլի խոսնակը ընդդիմադիր պատգամավորներին հայտնեց, որ ռեկտորը ինչ-որ հանդիպման է եւ առաջարկել է վաղը ցանկացած ժամի հանդիպել:

Ավելի ուշ պարզ դարձավ, որ ԵՊՀ ռեկտորի պաշտոնակատարը ներսում է, դուռը փակել է ներսից, դուրս չի գալիս. «Պետք է Նիկոլ Փաշինյանին փոխանցել, որ իր թիմի անդամները հրաժարվում են իր հետ կիսել պատասխանատվությունը, դադարեցնում են իրենց հետ համագործակցությունը, չեն կարողանում մարդկանց աչքերին նայելով ստանձնել ստանձնած քաղաքականության պատասխանատվությունը»,-ասաց ԱԺ «Հայաստան» խմբակցության պատգամավոր Քրիստինե Վարդանյանը:

Նույն խմբակցությունից Աննա Գրիգորյանն էլ հիշեցրեց, որ երբ ԱԺ-ում հարցուպատասխանի ժամանակ ընդդիմությունը լքեց դահլիճը, Նիկոլ Փաշինյանը հայտարարեց՝ վախեցաք, փախա՞ք: «Տղերք, հիմա դուք վախեցաք, փակվեցի՞ք: Նախարարներ, 2 օր է ձեզ ենք փնտրում, վախեցաք, փախա՞ք, ո՞ւր եք: Հայաստանում կա՞ մեկը, որ պատկան մարմնի ղեկավար է կամ ռեկտոր է, ի վիճակի՞ է դուրս գալ ու ԱԺ պատգամավորների հարցադրումներին պատասխանի: Եթե նման մարդ կա, թող հայտնվի, թե չէ, Նիկոլ, դու էլ, մնացածներն էլ փախած եք, ինչպես պատերազմի ժամանակ եք եղել»,-ասաց նա:

Ընդդիմադիր պատգամավորները այցելեցին նաեւ պրոռեկտորներին, պարզվեց նրանք եւս տեղում չեն:

«Դիմադրության» շարժման երթը ԵՊՀ-ից շարժվեց:

Նշենք, որ առավոտից «Դիմադրության» շարժման մասնակիցները երթ են անցկացնում Երեւանի փողոցներում: ԱԳՆ-ի մոտ ընդդիմադիր պատգամավորները ցանկացան հանդիպել նախարարների հետ, սակայն վերջիններս կամ տեղում չէին, կամ խուսափեցին նման հանդիպումից: Ընդդիմադիր պպատգամավորները, մասնավորապես, ցանկանում են հասկանալ, թե այս կամ այն բարձրաստիճան պաշտոնյան, հասարակական գործիչը ինչ դիրքորոշում ունի Արցախի հարցում: Արդյոք համաձայն է, որ Արցախը լինի Ադրբեջանի կազմում, թե ոչ:

Հիշեցնենք, որ ընդդիմության պատրաստած հայտարարության տեքստում նշվում է. «Հայաստանն աջակցելու է Արցախի ժողովրդի ինքնորոշման իրավունքի լիարժեք իրացմանը: Արցախը երբեք չի լինելու Ադրբեջանի կազմում:

Հայաստանի Հանրապետության և Արցախի Հանրապետության միջև պետք է լինի հուսալի ցամաքային կապ․ Արցախն անկլավ չի լինելու: Հայաստանի Հանրապետությունն Արցախի ժողովրդի անվտանգության և ինքնորոշման իրավունքի իրացման երաշխավորն է:

Սահմանագծման և սահմանազատման աշխատանքները պետք է իրականացվեն ՀՀ ինքնիշխան տարածքից Ադրբեջանի զորքերի դուրս բերման նախապայմանով: Սահմանագծման և սահմանազատման աշխատանքների արդյունքում բացառվում է Հայաստանի Հանրապետության ամբողջականության խաթարումը:

Հայ-թուրքական հարաբերությունների կարգավորման գործընթացում բացառվում է որևէ համաձայնություն, որը հարցականի տակ կդնի Հայոց ցեղասպանությունը:

Ադրբեջանի և Թուրքիայի հետ ճանապարհների ապաշրջափակումը չի կարող տեղի ունենալ միջանցքային տրամաբանությամբ»։