Համաշխարհային բանկը կանխատեսել է Ռուսաստանի եւ Ուկրաինայի ՀՆԱ-ի անկում

2022թ. Ռուսաստանի ՀՆԱ-ն կկրճատվի 11,2 տոկոսով, նշվել է Համաշխարհային բանկի Եվրոպայի եւ Կենտրոնական Ասիայի տնտեսությունների հեռանկարներին նվիրված զեկույցում, որը պատրաստվել է Ուկրաինայում ռուսական ռազմական գործողության համատեքստում։

Ինչպես նշում են ՀԲ-ի փորձագետները, «կանխատեսումների անորոշությունն աննախադեպորեն բարձր է», դա պայմանավորված է Ուկրաինայում մարտական գործողությունների ընթացքով եւ այդ գործողություններին համաշխարհային հանրության արձագանքով։ Զեկույցի հեղինակները մատնանշում են «արդեն մտցված պատժամիջոցների դաժան հետեւանքները», որոնք, ինչպես սպասվում է, կհանգեցնեն Ռուսաստանի տնտեսության անկման՝ հիմնականում ներքին պահանջարկի կրճատման պատճառով։

2023 եւ 2024թթ. սպասվում է ՀՆԱ-ի աճ՝ համապատասխանաբար 0,6 եւ 1,3 տոկոսով։

Համաշխարհային բանկի կանխատեսմամբ՝ գնաճը Ռուսաստանում 2022թ. արդյունքներով կկազմի 22 տոկոս (2021թ. այն 9 տոկոս էր)։ Ապրանքների եւ ծառայությունների արտահանումը կկրճատվի 30,9, ներմուծումը՝ 35,2 տոկոսով։ Աղքատության սահմանված շեմից ցածր եկամուտներ ունեցող բնակչության բաժինը 2022թ. կկհասնի 12,8 տոկոսի (2021թ. 11 տոկոս էր)՝ 2,6 մլն մարդ, նշել են փորձագետները։

Ինչ վերաբերում է Ուկրաինային, ապա ընթացիկ տարվա արդյունքներով երկրի ՀՆԱ-ի կրճատումը կարող է կազմել 45 տոկոս։ Այս կանխատեսումը հիմնված է «ներմուծման եւ արտահանման զանգվածային կրճատման վրա՝ առեւտրի ոլորտում խափանումների, պետական եւ մասնավոր հատվածներում կոլապսի եւ տնային տնտեսությունների զգալի անկման պատճառով»։

2025թ., վերլուծաբանների կարծիքով, տնտեսությունը կարող է 5 տոկոս եւ ավելի աճ գրանցել, բայց ՀՆԱ-ն դեռեւս կմնա այն մակարդակից զգալիորեն ցածր, որը կար ռազմական գործողությունն սկսվելուց առաջ։

Համաշխարհային բանկի փորձագետների կարծիքով՝ 2022թ. Ուկրաինայում կենսապահովման նվազագույնից ցածր եկամուտներ ունեցող բնակչության բաժինը կարող է հասնել 70 տոկոսի (2021թ. 18 տոկոսի համեմատ)։