2022 թվականին բյուջեի ծախսերի տոտալ կրճատում չի լինի․ Ֆիննախ

2022 թվականին բյուջեի ծախսերի տոտալ կրճատում չի լինի: Այս մասին մարտի 28-ին Ազգային ժողովում տնտեսական հարցերի մշտական ​​խորհրդարանական հանձնաժողովի նիստին Կառավարության 2021 թվականի ծրագրի կատարման վերաբերյալ քննարկումների ժամանակ ասաց ՀՀ ֆինանսների նախարար Տիգրան Խաչատրյանը։

Նախարարի խոսքով՝ իշխանությունները, անհրաժեշտության դեպքում, նոր պարտքեր կվերցնեն։ Ամեն ինչ կախված կլինի հարկերի հավաքումից։ Այս դինամիկան, ինչպես նշեց կառավարության ներկայացուցիչը, այժմ հնարավոր չէ ճշգրիտ կանխատեսել։ «Բայց ծախսերի կրճատման համար վարկեր վերցնել չենք պատրաստվում։ Պետք է աջակցել տնտեսությանը»,- պարզաբանեց Խաչատրյանը։

Նա հիշեցրեց, որ ԱՄՀ-ն, որից Հայաստանը բյուջետային վարկեր է վերցնում միջոցների սղության դեպքում, կարծում է, որ նման միջոցներ կարելի է ներգրավել՝ առանց երկրի վճարունակությանը վնաս հասցնելու։ Մասնավորապես, 2021 թվականին կապիտալ շինարարության ծախսերի պլանը՝ 218 մլրդ դրամ, կատարվել է 92.3 տոկոսով, ինչը զգալիորեն ավել է նախորդ տարիների համեմատ, օրինակ՝ նախաճգնաժամային 2019թ., երբ այն ընդամենը 75 տոկոս էր կազմում:

«2022 թվականին ծախսերի պլանը կավելանա մոտ 60 տոկոսով։ Ե՛ւ ֆինանսների նախարարությունը, ե՛ւ մյուս գերատեսչությունները՝ յուրաքանչյուրն իր մասով, փորձելու են մրցույթներ կազմակերպել եւ ամբողջությամբ իրականացնել դրանք։ Կապալառուներն արդեն պատրաստվում են դրան: Ուստի մենք չենք կրճատելու այդ ծախսերը՝ տնտեսական ակտիվությանն աջակցելու համար»,- ասաց նախարարը:

Նա ընդգծեց, որ Կենտրոնական բանկն արդեն զգալիորեն բարձրացրել է վերաֆինանսավորման տոկոսադրույքը։ Այն աճել է մինչեւ 9.25 տոկոս: Դա, ըստ նախարարի, կզսպի ապրանքների եւ ծառայությունների պահանջարկը վարկավորման կրճատման ճանապարհով։ «Միեւնույն ժամանակ, եթե դրան գումարենք բյուջեի ծախսերի կրճատումը, ապա գնաճն ավելի ուժեղ կնվազի։ Սակայն այդ դեպքում տնտեսությունը պարզապես չի կարողանա շնչել»,- նշեց Խաչատրյանը։