Ի՞նչ կկատարվի Շվեյցարիայի տնտեսության հետ առանց Ռուսաստանի գազի

Ռուսական նավթից ու գազից հրաժարվելը լուրջ հետեւանքներ կունենա Շվեյցարիայի տնտեսության համար։ Այս մասին շվեյցարական մի շարք կիրակնօրյա թերթերին տված հարցազրույցում ասել է երկրի տնտեսական հետազոտությունների ինստիտուտի առաջատար փորձագետ Ինգվե Աբրահամսենը։

Եթե էներգակիրների ներմուծումը դադարեցվի, օրինակ, Ռուսաստանի դեմ ավելի կոշտ պատժամիջոցների հետեւանքով, ապա երկու տարվա ընթացքում Շվեյցարիայի համախառն ներքին արդյունքը (ՀՆԱ) կնվազի 3-4 տոկոսով։ Այս հաշվարկները հրապարակվել են, մասնավորապես, SonntagsZeitung թերթում։

Միջին շվեյցարացու համար Ռուսաստանի դեմ էներգետիկ էմբարգոն տարեկան 3000 շվեյցարական ֆրանկ (3210 դոլար) կարժենա, գրում է swissinfo-ն։

«Այս ծավալի տնտեսական անկումը բավականաչափ մեծ է՝ արդյունաբերական ռեցեսիա առաջացնելու համար»,- հավելել է Ինգվե Աբրահամսենը: «Միեւնույն ժամանակ, մենք տեսնում ենք, թե որքան արագ է վերականգնվում Շվեյցարիայի տնտեսությունը կորոնավիրուսային համավարակից հետո, եւ դա հույս է ներշնչում, որ միայն սահմանափակ վնասներ կլինեն»:

Աբրահամսենը կարծում է, որ ընդհանուր առմամբ Շվեյցարիայի համար «իրատեսական կլինի սկսել շատ ավելի քչից, քան ավելի շուտ կախված լինել ռուսական ապրանքներից։ Ռուսաստանից մատակարարումների զգալի մասը կարող է փոխարինվել այլ աղբյուրներից մատակարարումներով։ Ռազմավարական պահուստների օգտագործումը նույնպես կարող է օգնել «անցումային շրջանում» տնտեսական խնդիրների հաղթահարմանը, սակայն այս ամենը կնշանակի գների աճ»։

Չեզոք Շվեյցարիան 2022թ․ փետրվարին որոշեց միանալ Ռուսաստանի ֆիզիկական եւ իրավաբանական անձանց դեմ Եվրամիության լայնածավալ տնտեսական պատժամիջոցներին․ Շվեյցարիայի համար սա իսկապես պատմական քայլ էր։ Սակայն առայժմ շվեյցարական պատժամիջոցները չեն ուղղվել հումքային ապրանքների դեմ: Le Matin Dimanche թերթը փորձել է վերլուծել Ուկրաինայի պատերազմի ազդեցությունը նորմալ շվեյցարական տնային տնտեսությունների վրա: Նրա գնահատականներով՝ կարող են թանկանալ ոչ միայն գազի եւ բենզինի, այլեւ սննդի գները։ Ըստ Mirabaud բանկի տնտեսագետ Ջոն Պլասարի՝ այս տարի Շվեյցարիայի սպառողները պետք է հաշվի առնեն հիմնական սննդամթերքի, ինչպիսիք են կարագը, ձուն, կաթը, հացը եւ բուսական յուղերը, 10-15%-ով հնարավոր թանկացումը: