Հայաստանի հավաքականը փայլուն հաղթանակ տարավ Իսպանիայի ընտրանու նկատմամբ. Շախմատի կանանց ԱԱ

Իսպանիայում ընթացող շախմատի աշխարհի կանանց թիմային առաջնության չորրորդ տուրում Հայաստանի հավաքականը 3,5-0,5 հաշվով փայլուն հաղթանակ տարավ տանտերերի՝ Իսպանիայի ընտրանու նկատմամբ: Մեր հավաքականում միակ ոչ-ոքի արդյունքը գրանցեց Էլինա Դանիելյանը: Լիլիթ Մկրտչյանը, Աննա Սարգսյանը և Սուսաննա Գաբոյանը հաղթեցին: Այս խաղից հետո Հայաստանի հավաքականը բարձրացավ երրորդ հորիզոնական:

Հիշեցնենք՝ մասնակից 12 հավաքականները բաժանվել են 2 խմբի։ Խմբում 1-4-րդ տեղերը գրաված թիմերը նվաճում են փլեյ-օֆֆի ուղեգրեր։ Հայաստանի հետ նույն խմբում են ընդգրկված Ռուսաստանի, Հնդկաստանի, Ադրբեջանի, Իսպանիայի և Ֆրանսիայի հավաքականները։