Ադրբեջանում գազը թանկացել է, իսկ SOCAR-ը 500 միլիոն դոլարանոց հանգստյան գոտի է նվիրել Ալիևներին

Ադրբեջանում բողոքի նոր ալիք է հասունանում: Անցած շաբաթ Ադրբեջանի Սակագնային խորհուրդը, ընդունելով պետական նավթային ընկերության՝ SOCAR-ի դիմում-առաջարկը, որոշել է բարձրացնել Ադրբեջանում բնական գազի մեծածախ և մանրածախ վաճառքի գները։ SOCAR-ը գնային փոփոխությունը պատճառաբանել է երկրում բնական գազի սպառման աճով: Օրբելի կենտրոնի վերլուծաբան Էլյա Հարությունյանի կարծիքով՝ գազի գնի փոփոխության իրական պատճառը երկրի ֆինանսական խնդիրներն են:

Փորձագիտական գնահատականների համաձայն՝ գազի գնի փոփոխությանը հաջորդելու է նաև էլեկտրաէներգիայի թանկացումը, քանի որ Ադրբեջանի էլեկտրակայանների շուրջ 80 %-ն աշխատում է բնական գազով, և անգամ չնչին բարձրացումն անխուսափելիորեն կազդի նաև էլեկտրաէներգիայի գնագոյացման վրա։ Սակագների փոփոխությունը բնակչության շրջանում դժգոհության պատճառ է դարձել:

Գազի գնի նման փոփոխության մեկ այլ պատճառ էլ, ըստ փորձագետների, SOCAR ընկերության ֆինանսական բարդ դրությունն է: Ադրբեջանցի ընդդիմադիր առաջնորդ Ջամիլ Հասանլին բողոքում է. չնայած կուտակված մեծ պարտքերին՝ ընկերությունը շարունակում է իրականացնել ոչ նպատակային ծախսեր, այդ թվում՝ միլիոնավոր դոլարներ հատկացնելով քարոզչական նպատակ ունեցող միջազգային սպորտային միջոցառումների վրա:

SOCAR-ի պարտքային ճգնաժամը մի կողմից պայմանավորված է վատնումներով, մյուս կողմից այն հանգամանքով, որ ընկերությունը դարձել է իշխող ընտանիքի, այսպես ասած, «կթու կովը»: Օրինակ՝ վերջերս հայտնի դարձավ, որ SOCAR-ը Չեռնոգորիայում 500 միլիոն դոլարով ձեռք բերած հանգստյան գոտին նվիրել է իշխող ընտանիքի «PASHA Holding»-ին: Պատկերացրեք, նման քանի գործարքի մասին տեղյակ չէ հանրություն:

Ըստ Ջամիլ Հասանլիի՝ գազի և էլեկտրաէներգիայի գնի բարձրացման իրական նպատակն ընկերության վտանգավոր չափի հասնող պարտքերի փոխհատուցումն է: