Ռուսաստանի դիրքերի թուլացումը հանգեցելու է անկանխատեսելիության. Էստոնիայի նախագահ

Էստոնիայի նախագահ Կերստի Կալյուլայդը MTV Uutiset-ին տված հարցազրույցում ասել է, որ Ռուսաստանը շուտով չի կարողանա ազդել աշխարհակարգի վրա: Ըստ Կալյուլայդի, Ռուսաստանի իշխանությունները տեղյակ են այդ մասին, ուստի նրանցից ցանկացած սպառնալիք կարելի է ակնկալել, սակայն նա չի կարող ասել` թե հստակ ինչի պետք է պատրաստվեն Բալթյան երկրները և Ֆինլանդիան: Այս հարցազրույցին անդրադարձել է ռուսական inosmi.ru լրատվական կայքը:

Էստոնիայի նախագահը կարծում է, որ, որպես խոշոր տերություն, համաշխարհային կարգի վրա ազդելու Ռուսաստանի կարողությունն արագորեն թուլանում է, ինչն էլ սրում է Ռուսաստանի գործողություննեի անկանխատեսելիությունը Բալթիկ ծովի տարածաշրջանում:

«Ռուսաստանն ինքը նույնպես հասկանում է, որ իր տնտեսական հզորությունն ավելի քիչ է, քան նախկինում: Երկրում տնտեսական վիճակը վատ է, տնտեսությունը չի աճում, ավելի ճիշտ կրճատվում է: Այս տնտեսությունն այլևս ժամանակակից անվանել չի ստացվի», - ասել է Կալյուլայդին:

Ըստ նրա, առաջիկա տաս-քսան տարվա ընթացքում Ռուսաստանից եկող սպառնալիքներն ու անկանխատեսելի գործողությունները միայն կավելանան, քանի որ միջազգային քաղաքականության մեջ աստիճանաբար փակվում է նրանց հնարավորությունների պատուհանը:

«Այսպիսով, Ռուսաստանը պետք է գտնի այս վիճակը շտկելու արագ, էժան և անկանխատեսելի եղանակներ: Եվ նա դա պետք է արագ անի », - ասել է Էստոնիայի նախագահը` հավելելով, որ իրենք պետք է անսովոր մեթոդների պատրաստ լինեն:

«Կարո՞ղ էինք գուշակել, թե ինչ կլինի Վրաստանում և Ուկրաինայում: Կարո՞ղ էինք կանխատեսել Սոլսբերիի դեպքերը: Կարո՞ղ ենք իմանալ, թե ինչ է լինելու Նավալնիի հետ: Միանշանակ ոչ: Կարծում եմ, որ հետագա իրադարձությունները կանխելու փորձերը դժվար թե արդյունք տան, բայց պետք է հիշել, որ մենք կարող ենք բախվել անսովոր գործողությունների», - ասել է նա և հավելել, որ Ռուսաստանի Դաշնությունը փորձելու է աշխարհակարգը այնպես կառուցել, որ այն հիմնված լինի ուժի և իր սեփական շահերի վրա: