Իրանը լուրջ հարված է հասցրել ԱՄՆ բանակի հեղինակությանը. փորձագետ

Իրանի պատասխան հրթիռային հարվածներով ԱՄՆ հեղինակությանը լուրջ վնաս է հասցվել: Այս մասին NEWS.am-ի հետ զրույցում ասաց ռազմական փորձագետ Վան Համբարձումյանը:

Փորձագետի խոսքով՝ ԱՄՆ-ն վաղուց է սադրում Թեհրանին՝ փորձելով նրան դուրս բերել բաց կոնֆլիկտի տարածաշրջանում իր ռազմական ներկայության հետագա ընդլայնման եւ Իրանին նախազգուշական հարվածներ հասնելու համար: Նրա կարծիքով՝ Իրանը գեներալ Ղասեմ Սոլեյմանիի սպանությունն ուղղակի չէր կարող անպատասխան թողնել, քանի որ վերջինին այնտեղ պատվում էին որպես ազգային հերոսի, եւ դրա համար ծանրակշիռ հիմքեր կային: «Սոլեյմանին Իրանի համար խորհրդանիշ էր, եւ նրա սպանությունը փաստացի պատերազմ հայտարարել էր: ԱՄՆ նախագահ Դոնալդ Թրամփն ու ամերիկյան քաղաքական ամբողջ ղեկավարությունը հրաշալի հասկանում էր, որ Իրանն իր գեներալի սպանությունն անպատասխան չի թողնի: Այդպես էլ եղավ: 1991 թվականից սկսած առաջին անգամ ամերիկյան ռազմաբազաներին այդպիսի լուրջ հարված հասցվեց: Մինչ այս համանման քայլ էր ձեռնարկել Իրաքի Զինված ուժերը՝ Սադամ Հուսեյնի փաստացի ղեկավարման օրոք, Իրաքյան առաջին պատերազմի ժամանակ օգտագործելով «Սքադ» Р-17 օպերատիվ-տակտիկական հրթիռները եւ հարվածներ հասցնելով Սաուդյան Արաբիայում տեղակայված ամերիկյան ռազմական օբյեկտներին: Այդ ժամանակ ԱՄՆ նախագահ Ջորջ Բուշ ավագը պարտքի տակ չմնաց: Սակայն հիմա այդպիսի արձագանք չհետեւեց, իսկ ամերիկացիները ստիպված էին առայժմ բավարարվել միայն Իրանի դեմ նոր պատժամիջոցներով»,- նշեց Համբարձումյանը:

Ընդ որում՝ ռազմական փորձագետը ընդունեց, որ ամերիկացիներն ինչ-որ չափով հասան իրենց նպատակին, քանի որ տարածաշրջանում իրենց ռազմական ներկայությունն ընդլայնելու առիթ ստացան: Նրանք սկսեցին տարածաշրջան տեղափոխել սպառազինության նոր տեսակներ եւ պատրաստվում են մեծացնել իրենց զորակազմը: «Ես մինչ սա էլ եմ ասել, որ ԱՄՆ նախագահական ընտրությունները որքան մոտենում են, այնքան Իրանի հետ էսկալացիայի վերականգնման հավանականությունը մեծանում է, քանի որ դրանում շահագրգռված է Թրամփն անձամբ: Կարծում եմ՝ բոլորը գիտեն, որ վերջին շրջանում ԱՄՆ-ում նրա վարկանիշն անկում է գրանցել: Թրամփին այսպիսի իրավիճակում լուրջ հաղթանակ էր անհրաժեշտ: Ինչպես ասվում է մի հին ասացվածքում՝ եթե երկրի ներսում իշխանությունից դժգոհ են, ապա շուտով պատերազմ կսկսվի, եւ դժգոհության այդ ալիքը կուղղվի արտաքին թշնամու կողմը»,- նշեց փորձագետը:

Հարցին՝ Իրանի հրթիռային հարվածները ԱՄՆ-ի համար որքանո՞վ էին անսպասելի՝ հաշվի առնելով այն, որ Թեհրանը Իրաքի իշխանություններին նախազգուշացրել էր նախատեսվող հարվածների մասին, Վան Համբարձումյանը պատասխանեց, որ ամերիկացիները տեղյակ էին պատրաստվող հարվածների մասին, սակայն նրանք, ըստ երեւույթին, հույս ունեին որսալ իրանական հրթիռները: Փորձագետը ամերիկացիների անհաջողությունը կապում է այն հանգամանքի հետ, որ ամերիկյան ՀՕՊ համակարգերը չափից շատ են գովաբանված, սակայն գործնականում իրանական նորագույն հրթիռները կարող էին որսալ միայն ամենաժամանակակից ամերիկյան եւ իսրայելական մշակումները:

Փորձագետն ասաց, որ ամերիկյան ռազմաբազաների վրա արձակվել են իրանական մոբիլ միաստիճան կոշտ վառելիքով «հող-հող» դասի Fateh-110, Fateh-313 հրթիռներ եւ գերժամանակակից ու «ամերիկացիների համար անչափ վտանգավոր» Qiam-1: Արդյունքում՝ ամերիկյան Patriot հակահրթիռային համալիրը անզոր գտնվեց ժամանակակից իրանական մշակումների դեմ: