Սերժ Թանկյանն ընդունել է Նիկոլ Փաշինյանի մարտահրավերը եւ այն ուղղել երեք հայտնի հայերի (Տեսանյութ)

Ես ընդունում եմ Հայաստանի վարչապետ Նիկոլ Փաշինյանի մարտահրավերը՝ ամեն ամիս 23 դոլար նվիրաբերել «Հայաստան» համահայկական հիմնադրամին: Այս մասին Facebook-ի իր էջում գրել է աշխարհահռչակ երաժիշտ Սերժ Թանկյանը:

Պայմաններից մեկն այն է, որ մարտահրավերն ընդունողները դա անեն հրապարակային եւ իրենք էլ իրենց հերթին երեք անձի մատնանշեն այս նախաձեռնությանը միանալու համար: Սերժ Թանկյանը մատնանշել է թատերագիր, նկարիչ, գրող, արվեստագետ Վահե Բերբերյանին, պրոդյուսեր Էրիկ Իսրաիլյանին, ամերիկահայ դերասանուհի Անժելա Սարաֆյանին:

«Ազատ զգացեք եւ միացել այս մարտահրավերին եւ մարտահրավեր նետեք այլոց՝ անելու նույնը: Մենք կարող ենք մեծ թվով մարդկանցով անել ավելին՝ նվիրաբերելով քիչ, քան փոքր թվով մարդկանցով նվիրաբերել շատ»,-նշել է Թանկյանը:

Հիշեցնենք, որ հեռուստամարաթոնի ժամանակ վարչապետ Նիկոլ Փաշինյանը մարտահրավեր էր նետել Սերժ Թանկյանին, Քիմ Քարդաշյանին եւ Reddit սոցիալական ցանցի համահիմնադիր Ալեքսիս Օհանյանին:

«Եթե 5 միլիոն հայ տարվա ընթացքում նվիրի հիմնադրամին 200 դոլար կամ ամիսը 20 դոլար կամ 20-ից մի քիչ շատ, տարվա կտրվածքով կունենանք 1 մլրդ 250 միլիոն դոլար։ Հիմնադրամի ամեն կոպեկի ծախսման արդյունավետությունը լինելու է կրկնակի, եռակի հսկողության տակ, մենք բացառելու ենք որեւէ չարաշահում։ Ես այսօր մտել եմ հիմնադրամի էջ եւ կարգավորումն այնպես եմ դրել, որ ամեն ամիս 10 հազար դրամ նվիրաբերվի հիմնադրամին։ Ես մարտահրավեր եմ նետում 3 հայի՝ Սերժ Թանկյանին, Քիմ Քարդաշյանինեւ Ալեքսիս Օհանյանին։ Շատ կարեւոր է, որ այս պրոցեսը անեք հրապարակային եւ մարտահրավեր նետեք եւս երեք հայի»,-ասել էր վարչապետը: